Mapa munisípiu Viqueque. Imajen/Espesiál

DILI, 10 marsu 2021 (TATOLI)—To’o oras ne’e Ministériu Edukasaun Joventude no Desportu (MEJD), seidauk halo reabilitasaun ba edifísiu eskola Ensino Basico Central (EBC), terseiru síklu 02 Kabira-oan, Munisípiu Viqueque ne’ebé ahi-han, iha tinan tolu liu bá.

Diretora eskola, Rita da Costa Soares,  hateten  iha 8 abríl 2018 edifísiu ne’e hetan inséndiu kauza hosi sirkuit liña eletrisidade no la konsege salva sala-de-aula tolu.

Notísia Relevante:COVID-19: konsellu profesór EBC 06 Kabira-oan suspende profesór na’in-rua

“Agora hela de’it sala-de-aula ida hosi edifísiu ne’ebé ahí-han ne’e mak sei bele utiliza hodi hala’o ensinu aprendizazen. Ita informa ona ba edukasaun munisipál no nasionál, maibé seidauk iha rezultadu,” Rita da Costa Soares hateten ba jornalista Agência Tatoli via telefónika, kuarta ne’e.

Nia hatutan, desde edifísiu ne’e hetan sunu, parte eskola halo fali oráriu ba prosesu ensinu aprendizazen aula prezensiál, maibé la tuir ona oráriu normál ne’ebé MEJD orienta.

“Ami tenki hamenus fali oráriu prezensiál ba prosesu ensinu aprendizazen tanba estudante na’in 120 iha sala-de-aula tolu ne’ebé ahí-han ne’e, tenki junta fali ba sala-de-aula sira seluk,” nia subliña.

Kada loron fahe ba parte tolu, kompostu hosi nono anu hahú hosi tuku 07:50 to’o 10:50, kontinua ho oitavu anu tama fali hosi 10:50 to’o 13:40, no sétimu anu hahú fali hosi 13:50 to’o 17:00.

Entretantu edifísiu eskola haat ne’ebé ida hetan inséndiu ne’e, konstrui hosi ajénsia Internasional JICA hosi Japaun, iha tinan 2004-2006.

Totál estudante ne’ebé hala’o estudu iha eskola ne’e hamutuk 485, ho profesór na’in 30 kompostu hosi permante 14 no kontratadu 16.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here