Mapa munisípiu Viqueque. Imajen/Espesiál

DILI, 10 marsu 2021 (TATOLI)—Konsellu Profesór hosi eskola Ensino Básico Central (EBC) 02 Kabira-oan Munsípiu Viqueque, suspende profesór na’in-rua no labele prezente iha aula hanesan baibain, tanba halo kontaktu direta ho funsionáriu Planu Nasionál Dezenvolvimentu Suku (PNDS) ida, ne’ebé mós kontaktu-direta ho funsionáriu Sekretária Estadu Formasaun Profisionál Empregu (SEFOPE) ne’ebé pozitivu COVID-19.

Diretóra EBC 06 Kabira oan, Rita da Costa Soares, dehan suspensaun atividade prezensiál ba profesór na’in-rua ne’e, la’ós desizaun hosi parte edukasaun nasionál, maibé parte eskola mak deside atu nune’e bele prevene ema hotu-hotu iha eskola ne’e hosi transmisaun COVID-19.

Notísia Relevante:Kumpre serka sanitária, funsionáriu SEFOPE halo serbisu hosi uma

“Ita lakohi atu akontese buat-ruma ne’ebé bele fó todan fali ba ema barak. Tanba ne’e, ita husu ba profesór na’in-rua ne’e atu hela lai iha uma hodi hein programa Ministériu Saúde-nian kona-bá teste swab,” Rita da Costa Soares hateten ba jornalista Agência Tatoli via telefónika, kuarta ne’e.

Nia mós klarifika liu tan katak, suspensaun ne’e tanba antes ne’e profesór na’in-rua ne’e hasoru-malu ho funsionáriu PNDS ida ne’ebé bá tuir formasaun iha Dili.

“Durante iha Dili funsionáriu PNDS ne’e hasoru-malu ho ninia tian ne’ebé serbisu iha SEFOPE. Ninia tian ne’e rasik pozitivu COVID-19 no oras ne’e iha ona sala izolamentu,” nia hateten.

Tanba ne’e Konsellu Profesór deside suspende lai profesór na’in-rua ne’e hosi atividade eskolár to’o hetan teste swab, bainhira laiha síntoma mak bele kontinua fali hanorin hanesan baibain.

Antes ne’e, iha domingu (07/03), Sala Situasaun Sentrru Integradu Jestaun Krize (CIGC, sigla portugés) anunsia katak hosi teste masál ba abitante 289 iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, deteta ema na’in-rua pozitivu COVID-19, ne’ebé pasiente ida hanesan funsionáriu SEFOPE.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here