Governadór BCTL, Abraão de Vasconcelos. Imajen TATOLI/António Gonçalves

DILI, 11 marsu 2021 (TATOLI)—Governadór Banco Central de Timor-Leste (BCTL), Abraão de Vasconcelos, rejeita publikasaun hosi mídia nasionál, Dili Post, kona-ba Banku Rezerva Federál Nova Iorke (FRBNY, sigla inglés) rekuza pedidu levantamentu fundu petrolíferu dala-tolu ona.

Nu’udar jestór ba fundu soberanu Estadu Timor-Leste, Governadór lamenta ho deklarasaun fontes informasaun ida hanesan Reitór Universidade da Páz (UNPAZ), Adolmando Amaral, ne’ebé fornese informasaun no publika iha Dili Post ho títulu “Banku Federál Amérika Rejeita Pedidu Levantamentu BCTL Dala Tolu”.

“Sente hakfodak ho reitór ida hosi universidade respeitável ida iha Timor-Leste halo deklarasaun ida sein verifika uluk verasidade informasaun ne’e, liuliu tanba BCTL hasai ona komunikadu ida iha loron 24 fevereiru hodi rejeita informasaun sira ne’ebé sirkula iha momentu ne’ebá,” Governadór BCTL relata liuhosi nota imprensa ne’ebé Agência TATOLI asesu, kinta ne’e.

 Notísia relevante: BCTL rejeita rumor Banku Federál impede asesu konta fundu petrolíferu

Tuir Dirijente ne’e, bazeia ba pedidu hosi Ministru Finansa, Rui Augusto Gomes, FRBNY halo ona transferénsia hosi fundu petrolíferu ho montante millaun $200 ba Konta Jerál Estadu iha loron 23 fevereiru liubá.

“Aleinde ne’e, FRBNY mós transfere ona osan ho montante totál millaun $886,3 hosi konta fundu petrolíferu ba Konta Jerál Estadu nian durante tinan 2020,” nia subliña.

Governadór hateten, nia parte la konsege entende didi’ak razaun funsionáriu Banku Sentrál balun ne’ebé hakarak fó sai informasaun falsu, tuir saida maka reitór universidade ne’e dehan iha notísia.

“Funsionáriu Banku Sentrál hotu sujeitu ba kódigu konduta ne’ebé estritu tebes no bazeia ba esperiénsia, BCTL laiha tradisaun atu divulga informasaun sira ne’ebé konsidera la merese atu publika,” Governadór akresenta.

Lei orgánica Banku Sentrál kontein dispozisaun sira ne’ebé proibe funsionáriu atu divulga informasaun não pública.

Abraão de Vasconselos reitera deklarasaun ba públiku katak Banku Federal kontinua sai parseiru valiozu no konfiante ne’ebé apoia ona BCTL halo jestaun konta fundu petrolíferu dezde inísiu tinan 2005.

Bazeia ba lei númeru 9/2005 3 agostu kona-ba Lei Fundu Petrolíferu, artigu 11 kona-ba jetaun fun petrolíferu, BCTL hanesan jestór operasionál fundu petrolíferu, ne’ebé investe fundu kapitál ho orientasaun estabelesidu hosi Ministériu Finansa no mandatu Konsellu Konsultivu.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here