Governadór BCTL, Abrãao de Vasconselhos. Imajen TATOLI/António Gonçalves

DILI, 25 fevereiru 2021 (TATOLI)–Governadór Banco Central de Timor-Leste (BCTL), Abraão de Vasconselos, rejeita notísia ne’ebé sirkula iha públiku kona-ba impede levantamentu fundu petrolíferu Timor-Leste, ne’ebé mak rai iha Banku Federál Amérika.

“BCTL nunka hetan impedimentu atu asesu ba konta fundu petrolíferu iha Banku Federal Reserve New York no mós laiha indikasaun ruma hosi banku amerikanu ne’e atu foti medida ba asaun ne’e,” refere nota ne’ebé Agência TATOLI asesu, kinta ne’e.

Governadór esplika, bainhira Governu Timor-Leste hakarak halo levantamentu konta fundu petrolíferu, maka Ministériu Finansa simplesmente haruka karta instrusaun transferénsia ida ba BCTL hafoin prosesu polítiku hotu konklui no públika ona iha Jornal da Repúblika, enkuantu restante prosesu ne’e kompeténsia Banku Sentrál ninia.

Nia dehan, iha notísia balun ne’ebé propoin Banku Federál impede ona Governu Timor-Leste atu asesu ba konta fundu petrolíferu.

“Ami hakarak esklarese katak notísia ne’e kompletamente laiha baze no faktu ruma. Banku Sentrál hakarak klarifika katak konta ne’ebé iha Federal Reserve Bank of New York nu’udar fundu Estadu Timor-Leste no rejistu hodi BCTL nia naran no jere entre kolaborasaun BCTL no Federal Reserve Bank of New York. Lei prevee ona katak Governu apenas iha konta ida de’it iha BCTL,” Dirijente Banku ne’e afirma.

Governadór nota katak informasaun ne’e kontráriu tebes tanba Banku Federál kontinua sai nafatin parseiru valiozu no konfiante, ne’ebé fó ona apoiu másimu mai BCTL iha jestaun fundu petrolíferu dezde inísiu tinan 2005.

Nune’e, hahú tinan 2001, Timor-Leste iha ona relasaun  di’ak tebes ho Banku Federál, ne’ebé fasilita ona prosesu pagamentu hotu ne’ebé simu hosi Banku Sentrál relasiona ho fundu petrolíferu no mós operasaun bankária sira seluk tan.

Ikus liu, Governadór Vasconselos hakarak apela ba públiku no mídia sira hotu atu hapara sirkula informasaun ne’ebé la loos.

“Iha futuru mai, husu ba públiku no mídia tenke verifika faktu sira iha BCTL no Ministériu Finansa molok repete rumor ne’ebé la hó justifikasaun kona-ba jestaun fundu petrolífera,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here