Embaixadór Timor-Leste ba Cambodia, Hermenegildo Kupa Lopes halo enkontru kortezia Governador Phnom Penh, HHUONG Sreng no nia estrutura hodi ko’alia kona-ba kooperasaun bilateral entre TL ho Phnom Penh, Cambodia 21 janeiru 2021. Imajen/Embaixada TL ba Cambodia

DILI, 11 marsu 2021 (TATOLI) – Embaixadór Timor-Leste ba Cambodia, Hermenegildo Kupa Lopes, hateten bainhira Covid-19 remata Estadu Cambodia hakarak estabelese kooperasaun komersiál ida ho Timor-Leste hodi bele loke vou direita hosi Phnom Penh, Cambodia mai Dili no bele mós liuhosi Sidney-Australia ka Denpasar-Bali, Indonézia nune’e bele fasilita populasaun nasaun rua vizita  ba malu.

Hermenegildo Kupa Lopes hasoru malu ona ho Ministru Aviasaun Sivíl Cambodia nian diskute kona ba Cambodia nia Governasaun aprova ona MoU ida oinsá iha tempu besik bele fasilita sidadaun rai-rua liu hosi vou komersiál nian.

Notísia Relevante : Cambodia oferese ajudu umanitária mai povu Timor-Leste

Embaixadór Timor-Leste ba Cambodia, Hermenegildo Kupa Lopes halo enkontru kortezia Governador Phnom Penh, HHUONG Sreng no nia estrutura, Cambodia 21 janeiru 2021. Imajen/Embaixada TL ba Cambodia

“Haree ba estimasaun komersiál, talvés ladún iha pasajeiru Dili-Phnom Penh. Tanba ne’e, bele fasilita liu mós hosi Australia no Indonézia para bele iha mós pasajeiru sira,” Hermenegildo Kupa ba  hateten Agência Tatoli via WhatsApp, kinta ne’e.

Nia dehan bainhira atu realiza vou ne’e, Governu rai-rua sei asina uluk lai Air Agreement Service hanesan lisensa ida hodi fasilita aviaun semo ba mai ho livre.

Ba pedidu Cambodia nian ne’e, Embaixadór Kupa   manda ona mai Governu  sentrál liuhosi Ministériu Negósiu Estranjeiru no Kooperasaun (MNEK) hodi haruka ba ministériu kompetente hanesan Ministériu Transporte no Komunikasaun (MTK) atu haree, nune’e iha tempu badak bele asina ona MoU entre parte sira.

Embaixadór Hermenegildo Kupa Lopes mós halo enkontru kortezia ho membru Governu sira Cambodia nian hodi introdús kona-ba poténsia investimentu iha Timor-Leste, liuliu iha area turizmu no agrikultura.

Embaixadór Timor-Leste ba Cambodia, Hermenegildo Kupa Lopes Governador Phnom Penh, HHUONG Sreng troka prenda. Imajen/Embaixada TL ba Cambodia

Liuhosi sorumutuk sira ne’e, Governu Cambodia iha entuziazmu atu ajuda Timor-Leste dezenvolve seitor turizmu Timor-Leste nian. Nune’e, iha tempu besik Gvoernu TL ho Cambodia sei  asina MoU ida hodi apoiu malu dezenvolve di’ak liután poténsia sira kona-ba turizmu nian iha TL.

Nia mós ko’alia ona ho Governu Cambodia, bainhira situasaun pandemia COVID-19 nee termina, sei fasilita Timor-oan sira bele halo estudu komparativu iha Cambodia iha setór oioin, nune’e bele sai referénsia ba Timor-Leste oinsá dezenvolve nia  poténsia sira natureza turizmu, akultura no peska.

Timor-Leste hanesan nasaun ki’ik ida ne’ebé iha Sudeste Aziátiku ho medida jeográfika 15,007 kilómetru kuadradu no populasaun hamutuk millaun 1.29.

Bainhira nasaun ne’e restaura nia independénsia iha 2002, nasaun ne’e buka kedan atu hola parte iha membru iha Sudeste Aziátiku no Cambodia firme hodi afirma nia prontidaun hodi suporta tebes Timor-Leste nia adezaun ne’e.

Maski nasaun Timor – Leste ki’ik tebes iha Ázia, maibé nia turizmu konsege dada ona ema internasionál barak mai vizita. Maibé ho kooperasaun di’ak entre nasaun rua ne’e bainhira Covid-19 remata turista hosi Cambodia barak sei vizita Timor – Leste.

Tuir reportajen iha media balun iha Cambodia hatudu iha 2019 vizitante hosi Timor-Leste ba Cambodia hamutuk ema na’in-179. Enkuantu iha 2020 Cambodia simu de’it turizmu hosi Timor-Leste hamutuk 20.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here