Embaixadór Timor-Leste ba Cambodia, Hermenegildo “Kupa” Lopes, halo enkontru kortezia ho Primeiru-Ministru Cambodia, Samdech Akka Moha Sena Padei Techo Hun Sen, iha Cambodia, foin lalais ne’e. Imajen/Espesiál

DILI, 01 dezembru 2020 (TATOLI) – Estadu no Governu Cambodia prepara ona apoiu umanitária hanesan ekipamentu saúde nian ho kuantidade aviaun-rua atu haruka mai Timor-Leste hodi ajuda Timor-Leste nia luta kontra surtu Coronavirus ka COVID-19.

Autoridade Cambodia hahú hasa’e sasán apoiu umanitária ba aviaun Cambodia Airways atu transporta mai Timor-Leste. Imajen/freshnewsasia.com

Ekipamentu saúde ba prevensaun COVID-19 ne’ebé oferese hosi Cambodia ne’e, kuarta (02/12), purvolta tuku 11.45 Otl, to’o iha Aeroportu Internasionál Prezidente Nicolau dos Reis Lobato, ho aviaun Cambodia Airways.

Embaixadór Timor-Leste ba Cambodia, Hermenegildo “Kupa” Lopes, informa ba Agência Tatoli, ohin, via telefone hosi Cambodia  katak, preparasaun no koordenasaun-sira hotu kona-ba oferta hosi Cambodia mai Timor-Leste ne’e finaliza ona no tuir oráriu aviaun-rua Cambodia Airways sei transporta fasilidade saúde-sira ne’e ba Timor-Leste nu’udar apoiu no domin boot ne’ebé Estadu Cambodia iha ba povu Timor-Leste hodi hamutuk luta kontra propagasaun peste letál COVID-19.

Nia hateten, aviaun Cambodia Airways rua ne’ebé transporta apoia umanitária ne’e sei akompaña mós hosi delegasaun boot Governu Cambodia nian hodi ba entrega diretamente ba Ministériu Negósiu Estranjeiru no Kooperasaun  (MNEC) no Ministériu Saúde (MS) iha Aeroportu Internasionál Prezidente Nicolau dos Reis Lobato, Comoro, Dili.

Autoridade Cambodia hahú hasa’e sasán apoiu umanitária ba aviaun Cambodia Airways atu transporta mai Timor-Leste. Imajen/freshnewsasia.com

“Cambodia mós enfrenta situasaun hanesan ho Timor-Leste iha luta kontra peste letál COVID-19, maibé tanba sira iha kapasidade prodús fasilidade médiku, tanba ne’e, sira buka ajuda nasaun-sira ne’ebé presiza atu fahe sira-nia domin-boot ajudu umanitária, hanesan mós sira halo ba povu Laos no povu Myanmar,” Embaixadór Hermenegildo “Kupa” Lopes haktuir.

Tuir nia haree ajudu ne’e hanesan apoiu ho kuantidade boot iha istória Timor-Leste nian, relasiona ho  oferta sira ne’ebé nasaun postu konflitu   hanesan Cambodia entrega mai nia belun-boot povu Timor-Leste.

Oráriu ne’ebé iha katak delegasaun Governu Cambodia nian ne’ebé akompaña apoiu umanitáriu ne’e entrega tiha ba Governu Timor-Leste sei fila kedas ba Cambodia ho sira-nia aviaun Cambodia Airways.

Autoridade Cambodia hahú hasa’e sasán apoiu umanitária ba aviaun Cambodia Airways atu transporta mai Timor-Leste. Imajen/freshnewsasia.com

“Ha’u halo enkontru kortezia ho Liurai Cambodia, Primeiru-Ministru Cambodia no Governante lubun, ne’ebé sira hotu apoiu maka’as atu ita nia adezaun ba ASEAN no hamutuk ho ita atu luta kontra surtu COVID-19,” Hermenegildo “Kupa” hateten.

Depois ultrapasa tiha situasaun COVID-19, Embaixadór Hermenegildo “Kupa” tenik, Governu Cambodia hakarak vizita Timor-Leste hodi aprofunda  kooperasaun  ho Timor-Leste, liuliu oinsá Cambodia ho Timor-Leste bele hasae volume kooperasaun ekonomia no hanoin mós atu loke vou ida hosi Cambodia ba Bali, Dili no Australia.

Autoridade Cambodia hahú hasa’e sasán apoiu umanitária ba aviaun Cambodia Airways atu transporta mai Timor-Leste. Imajen/freshnewsasia.com

Governu Cambodia mós hatudu nia prontidaun atu koopera ho Timor-Leste hodi hamutuk dezenvolve setór turizmu, tanba Cambodia iha esperiénsia maka’as dezenvolve sira-nia setór turizmu hodi sai hanesan setór ne’ebé kontribui maka’as ba rendimentu Estadu.

“Sira mós iha esperiénsia produsaun agríkola hodi halo esportasaun ba Xina, Korea  no Japaun. Sira hakarak fahe esperiénsia hotu ho ita no ajuda ita. Tanba ne’e mak liu tiha situasaun COVID-19, delegasaun Governu Cambodia nian sei halo vizita kortezia mai Timor-Leste atu aprofunda kooperasaun iha area sira-ne’e,” Embaixadór Hermenegildo “Kupa” hateten hodi lia tun tan dehan, Cambodia gosta tebes Timor nia kafé orgániku, ho nune’e, sira hakarak atu Timor-Leste bele esporta kafé ba Cambodia livre impostu (taxa).

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here