Diretora Sentru Saúde Munisípiu Liquiça, Apolonia dos Santos. Imajen Tatoli/Hortencio Sanches

LIQUIÇA, 10 marsu 2021 (TATOLI) – Pesoál Saúde sira ne’ebé hala’o knar iha Sentru Saúde Liquiça, prontu dedika sira-nia kbiit, matenek no abilidade, hamutuk ho povu lota kontra propagasaun peste letál COVID-19.

“Durante ne’e, ami preparadu hodi enfrenta situasaun ida difisil hanesan ne’e, liga ba propagasaun  COVID-19 nian. Ami mós servisu hamutuk ho Polísia hodi fahe ona informasaun no broxura ba komunidade sira hosi parte Loes to’o Tibar atu komunidade sira bele prevene an nafatin hodi kumpre  regra saúde públiku,”  Diretora Sentru Saúde Munisípiu Liquiça,  Apolonia dos Santos, informa ba jornalista sira iha edifísiu Sentru Saúde Liquiça, kuarta ne’e.

Notísia Relevante : CIGC Seidauk Deteta Kazu Transmisaun Lokál COVID-19 iha Liquiça

Nia mós fó ona orientasaun ba postu saúde hotu iha Liquiça atu kontinua kontrola komunidade sira no kontinua halo sosializasaun kona-ba medida prevensaun COVID-19 hanesan fase-liman beibeik ho sábadu,  evita halibur malu, evita kontaktu fíziku, uza máskara  no seluk tan.

Iha situasaun balun liubá, abitante sira iha Liquiça submete hotu ona ba teste swab bainhira deteta profesora Portugés iha ida sintoma COVID-19.

“Ami nia ekipamentu hodi halo atendimentu ne’e sufisiente hela, liuliu ba iha APD (alat pelindung diri) no máskara hodi apoiu ba servisu prevensaun COVID-19 nian,” nia relata.

Pesoál saúde iha liña frente iha Liquiça nian hamutuk na’in-85 no ajuda mós hosi voluntáriu sira. Tanba ne’e,  Apolonia dos Santos, garante sira-nia rekursu sufisiente atu atende situasaun emerjénsia iha ámbitu pandemia COVID-19.

Notísia Relevante : Laloos, kazu pozitivu iha Liquiça ho Dili

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here