Portavóz Gabinete Sentru Integradu Jestaun Krize, Sérgio Lobo. Imajen Tatoli/Egas Cristóvão

DILI, 21 abríl 2020 (TATOLI)-Portavóz Sala Situasaun Sentru Integradu Jestaun Krize (CIGC-sigla portugés) Sergio Lobo, hateten to’o tersa (21/04/2020) ekipa vijilánsia epidemiolójika seidauk deteta kazu transmisaun surtu COVID-19 foun ba komunidade iha Liquiça maski grupu profesóra portugés ida iha Munisípiu ne’ebá konfirmadu coronavirus.

“Agora ita halo monitorizasaun makaas ba iha kazu ne’ebé akontese iha Liquiça, maibé to’o ohin loron foin simu kontaktu hosi ita-nia ekipa vijilánsia epidemilójika katak seidauk hetan kazu ida kona-ba transmisaun lokál iha ne’ebá alende nain rua ne’ebé hetan ona pozitivu ne’e,” informa, Sergio Lobo durante konferénsia imprensa, iha Sentru Konvensaun Dili (CCD-sigla portugés) tersa ohin.

Notísia Relevante :Profesór Portugés Konfirmadu Pozitivu COVID-19 Iha Istória Viajen La Hanesan

Iha parte seluk, kona-ba rezultadu teste Laboratóriu Nasionál ba okupante Kuarentena ne’ebé hetan fila fali sintoma hafoin re-integra ba família, Eis Minsitru-Saúde, Sergio Lobo hateten rezultadu negativu.

“Sira ne’ebé sai tia ona hosi kuarentena hetan fali sintoma ne’e husi Kuarentena Same, Aileu no mós Ermera, sira hato’o keixa ita konsege halo teste ba sira horiseik rezultadu teste hatudu sira ne’e negativu hotu,” relata Sergio Lobo.

Maibé ba abitante na’in lima iha Kuarentena Manatuto tuir loloos fila ona ba idak-idak nia família iha loron rua liubá maibé husi sira ne’e, na’in rua sei kontinua hetan sintoma ba COVID-19 tanba ne’e sei estende tan hodi hein rezultadu teste.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here