Prezidente Komisaun D, ne’ebé trata asuntu ekonomia no dezenvolvimentu, Deputadu Antoninho Bianco. Imajen TATOLI/Egas Cristovão

DILI, 10 marsu 2021 (TATOLI)—Komisaun D ne’ebé trata asuntu Ekonomia no Dezenvolvimentu seidauk finaliza aprovasaun projetu-lei kódigu mineiru iha faze jeneralidade tanba situasaun surtu COVID-19.

Notísia Relevante: Projetu-lei kódigu mineiru sei asegura rikusoin minerál iha rai-laran

“Ami aprova ona projetu-lei kódigu mineiru hamutuk artigu 64, ami atu kontinua maibé tanba situasaun COVID-19 halo ami pendente hela,” Preidente Komisaun D (ekonomia no dezenvolvimentu), Deputadu Antoninho Bianco, informa liuhosi plenária, tersa ne’e.

Komisaun D hala’o diskusaun no aprovasaun kada artigu faze espesialidade ne’e hala’o iha Munisípiu Liquiçá.

Nia hatutan, bainhira projetu-lei ne’e sai ba lei sei asegura riku-soin barak hodi atrai konfiansa hosi ema estranjeiru atu investe iha Timor-Leste.

Konteúdu hosi projetu-lei kódigu mineiru ne’e regula atividade minerál nian tanba presiza halo ezersísiu hodi respeita inklui atividade rekoñesimentu preliminár, prospesaun ba-oin no peskiza, avaliasaun, dezenvolvimentu, esplorasaun no tratamentu iha área minerál rai-laran nian.

Nune’e mós transporte no komersializasaun minerál hodi haree fila-fali importánsia ba Estadu RDTL, liuliu kuandu atende impaktu no fornesimentu ba matéria prima esensiál sira ba dezenvolvimentu, kresimentu ekonómiku no prosperiedade nasaun nian.

Projetu-Lei Kódigu Mineiru hamutuk artigu 162 ho kapítulu 20 no anexu 3. Artigu 1 define aprovasaun kódigu mineiru, artigu 2 define polítika mineira, artigu 3 define objetivu sira kona-ba estratéjia setór mineiru nian no ikus liu artigu 162 ne’ebé define dispozisaun tranzitória.

Iha loron 30 jullu 2020 liubá, projetu-lei númeru 4/V(1a) kona-ba kódigu mineiru ne’e aprovadu iha faze jeneralidade ho rezultadu votasaun a-favór 54, kontra 0 no abstensaun 0.

Proponente ba projetu-lei ne’e mak hanesan Deputada Virgínia Ana Belo, Deputadu Duarte Nunes, Adérito Hugo da Costa, Francisco de Vasconcelos, António Nobre Tilman, Maria Fernanda Lay, Maria Terezinha Viegas, Mariano Assanami Sabino, António da Conceição no Maria Angelina Lopes Sarmento.

Proponente Projetu-Lei Kódigu Mineiru, Deputada Virgínia Ana Belo, fundamenta antes ne’e katak, lei ne’e importante hodi subtitui fundu petróleu.

“Razaun tanba saida mak ita konsidera lei ne’e importante tanba ita hakarak kore-an neineik hosi fundu petróleu, ne’e mak ita-nia objetivu loloos. Kódigu Mineiru ninia kuantia la’ós boot, nia kiik maibé nia ne’e hodi la’o ba tempu naruk, ita bele uza nia iha tempu naruk, nia la hotu lalais hanesan fundu petróleu”, proponente ne’e fundamenta.

Nia hatutan, objetivu ida tán hosi Kódigu Mineiru tanba fundu petróleu ne’e hanesan rikeza nasionál entaun Komisaun D konsidera katak kódigu mineiru bele sai baze dezenvolvimentu iha munisípiu sira.

“Tanba ita bele deteta kada munisípiu nia rikusoin balun hodi bele dezenvolve munisípiu no restu ita bele fahe ba munisípiu seluk,” nia dehan.

Entretantu, proponente Deputadu Adérito Hugo da Costa dehan, Timor-Leste iha nesesidade iha lei refere tanba riku-soin minerál barak tebes entaun presiza lei ida hodi halo regulamentasaun.

“Ita haree esperiénsia ema suru rai-henek iha mota Comoro no Liquiçá ho de’it diploma ministerial no kompañia sira ba suru rai-henek maibé la fó kontribuisaun reseita ba Estadu. Tanba ne’e, mak tempu to’o ona no ha’u brani deside sai hanesan proponente hod elabora projetu lei ida-ne’e nune’e ita tama ona ba seriedade atu jere ho didi’ak rekursu mineral sira maibé tenke iha Lei Kódigu Mineiru (undang-udang pertambangan),” nia dehan.

Deputadu Bankada Partidu Demokrátiku, Mariano Assanami “Sabino”, hateten rekursu minerál sira tenke konsentrasaun prinsipál ba Estadu Timor-Leste.

“Nu’udar proponente ha’u haree katak estrutura lei ne’e di’ak ona, karik ita aprova depois mak ita ko’alia detallu kada artigu iha laran,” Assanami dehan.

Bainhira Komisaun D finaliza ona diskusaun no aprovasaun iha faze espesialidade, sei aprezenta relatóriu no paresér ba plenária hodi halo aprovasaun iha final globál.

Notísia Relevante: PN aprova projetu-lei kódigu mineiru iha faze jeneralidade

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here