Prezidente Komisaun D, Deputadu Antoninho Bianco. Imajen TATOLI/Evaristo Soares Martins.

DILI, 07 janeiru 2021 (TATOLI)—Parlamentu Nasionál sei halo debate kontinuasaun ba projetu-lei kódigu mineiru nune’e bele hetan aprovasaun iha espesialidade hodi bele regula rikusoin minerál sira iha rai-laran.

Notísia Relevante: PN aprova projetu-lei kódigu mineiru iha faze jeneralidade

“Lei kódigu mineru ne’e importante tanba bele asegura rikusoin sira iha rai leten no bele dada investidór sira mai iha Timor-Leste. Ita bele esplora, la’ós mina-rai de’it maibé kódigu mineru ne’e regula fatuk, osan-mean, osan-mutin, sementu, marmer, ita atu esplora ita tenke iha lei ne’e,” Prezidente Komisaun D (Ekonomia no Dezenvolvimentu), Deputadu Antoninho Bianco, informa ba jornalista sira, iha Parlamentu Nasionál, kinta ne’e.

Parlamentu Nasionál aprova ona projetu-lei refere iha faze jeneralidade ho unanimidade. Prezidente Komisaun ne’e, espera iha espesialidade mós sei hetan unanimidade tanba atu dada investidór mai Timor-Leste.

Deputadu Antoninho Bianco fó-sa katak, kontinuasaun diskusaun ba espesialidade sei akontese iha fulan ida-ne’e. Parlamentu Nasionál, iha loron-kinta 30 fulan-jullu 2020 liubá aprova Projetu-Lei Kódigu Mineiru iha faze jeneralidade nune’e regula rekursu mineral sira iha rai-laran.

Komisaun D (Ekonomia no Dezenvolvimentu) aprezenta plenária kona-ba relatóriu no pareser Projetu-Lei Nú 4/V(1a) Kódigu Mineiru. Hafoin diskusaun Parlamentu Nasionál aprova ho votu a-favór 54 kontra 0 no abstensaun 0.

Proponente ba Projetu-Lei ne’e mak hanesan Deputada Virgínia Ana Belo, Deputadu Duarte Nunes, Adérito Hugo da Costa, Francisco de Vasconcelos, António Nobre Tilman, Maria Fernanda Lay, Maria Terezinha Viegas, Mariano Assanami Sabino, António da Conceição no Maria Angelina Lopes Sarmento.

Konteúdu hosi Projetu-Lei Kódigu Mineiru ne’e regula atividade minerál nian presiza halo ezersísiu hodi respeita inklui atividade rekoñesimentu preliminár, prospesaun ba-oin no peskiza, avaliasaun, dezenvolvimentu, esplorasaun no tratamentu iha área minerál rai-laran nian.

Nune’e mós, nia dehan, transporte no komersializasaun minerál hodi haree fila-fali importánsia ba Estadu RDTL, liuliu kuandu atende impaktu no fornesimentu ba materia prima sira, esensiál ba dezenvolvimentu, kresimentu ekonómiku no prosperiedade nasaun nian.

Projetu-Lei Kódigu Mineiru hamutuk artigu 162 ho kapítulu 20 no anexu tolu (3). Artigu 1 define aprovasaun kódigu mineiru, artigu 2 define polítika mineiru, artigu 3 define objetivu sira kona-ba estratéjia setór mineiru nian no ikus liu artigu 162 ne’ebé define dispozisaun tranzitória.

Notisia Relevante: PN sei rezolve projetu-lei no proposta-lei pendente sira iha 2021

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here