Primeiru-Ministru, Taur Matan Ruak, prezide reuniaun Konsellu Ministru estaordinária iha salaun Ministériu Finansa, Aitarak-laran, kuarta (10/03). Imajen TATOLI/Egas Cristóvão

DILI, 10 marsu 2021 (TATOLI)—Reuniaun Konsellu Ministru iha kuarta ne’e rona aprezentasaun hosi Primeiru-Ministru, Taur Matan Ruak, kona-ba situasaun epidemiolójika iha munisípiu Covalima, nune’e ezekutivu delibera atu termina impozisaun serka sanitária iha munisípiu ne’e, exetu iha postu administrativu Fatumean tanba konsidera hanesan zona risku ba surtu COVID-19.

Tuir Ministru Prezidénsia Konsellu Ministru, Fidelis Manuel Leite Magalhães, desizaun ne’e tanba haree ba evolusaun kazu pozitivu ne’ebé laiha aumentu signifikativu iha loron hirak ne’e.

“Aplikasaun serka sanitária iha postu administrativu Fatumean sei mantein to’o loron 21 marsu. Servisu administrasaun públika no eskola sira sei kontinua taka to’o loron 13 marsu oinmai, tuir determinasaun hosi membru Governu responsável,” Ministru Fidelis relata hafoin reuniaun ezekutivu iha salaun Ministériu Finansa (MF), Aitarak-laran, kuarta ne’e.

Notísia relevante: Governu kontinua aplika serka sanitária iha Covalima, autoriza transporta sasán

Portavós Governu ne’e akresenta, maski termina ona serka sanitária maibé husu populasaun iha munisípiu Covalima ne’ebé halo movimentu bá-mai tenke kumpre nafatin medida prevesaun sira.

“Sira (komunidade) bele halo movimentu iha munisípiu laran, bele hahú fali atividade hanesan bain-bain, maibé medida tenke implementa nafatin tanba ita hatene katak indikadór ne’ebé Sentru Integradu Jestaun Krize hato’o katak moras foun laiha, exeptu iha Fatumean, enkuantu postu administrativu seluk laiha. Ita mós konsege kontrola ona hirak ne’ebé moras hela,” governante ne’e esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here