Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, tersa (02/03). Imajen TATOLI/Egas Cristóvão

DILI, 02 marsu 2021 (TATOLI)–Governu kontinua aplika serka sanitária iha munisípiu Covalima, maibé fó fleksibilidade atu ema transporta sasán hanesan ai-han, nesesidade bázika no medikamentu ba munisípiu ne’e.

Governu hola desizaun ne’e liuhosi reuniaun Konsellu Ministru (KM) hodi halo aprovasaun ba projetu Rezolusaun Governu, ne’ebé renova impozisaun serka sanitária iha munisípiu Covalima.

“Mantein bandu deslokasaun hosi munisípiu ida-ne’e bá munisípiu seluk, entre oras 00:00 loron 04 marsu 2021 to’o oras 23:59 iha loron 02 abríl 2021. Ministru Interiór bele mós autoriza deslokasaun ema no merkadoria, ho fundamentu razaun umanitária ba protesaun saúde públika, seguransa públika ka interese públiku, no define kondisaun saida maka presiza realiza,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, tersa ne’e.

Notísia relevante: CIGC rekomenda termina serka sanitária iha Bobonaro, intensifika vijilánsia sentinela

Enkuantu, ema hirak ne’ebé lori ai-han no sasán emerjénsia sira ne’e kuandu filafali mai Dili sei la tama kuarentena tanba iha rezolusaun Governu ne’e la prevee.

Portavós Governu ne’e klarifika, bainhira atu lori hahán no sasán emerjénsia sira ba Covalima, presiza halo komunikasaun ho Sala Situasaun Sentru Integradu Jestaun Krize (CIGC, sigla portugés) iha Dili, nune’e mós CIGC iha Covalima liuhosi Unidade Forsa Territoriál hodi lori transporte ho sasán sira  ba pontu ou fatin ne’ebé define ona nu’udar fatin seguru, no to’o iha fatin sira ne’e maka pesoál lojíztika Covalima nian foti hodi halo tuir medida sanitária molok distribui ba fatin sira ne’ebé presiza.

“Tanba moras ne’ebé daudaun la’o hela iha Suai foin to’o iha nível ida hanaran transmisaun lokál, katak ita sei hatene hela fatin ema hirak ne’ebé infetadu COVOD-19, ho ida ne’e katak ita seidauk to’o iha faze ida hanaran transmisaun komunitária, entaun sei bele loke dalan atu ita iha korridór umanitária ida-ne’e,” nia akresenta.

Hafoin avalia situasaun sira, KM deside halo kotu ona serka sanitária iha munisípiu Bobonaro tanba tuir relatóriu hosi Ministériu Saúde (MS) katak munisípiu ne’e la rejista kazu transmisaun lokál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here