Diretór Jerál Empregu SEFOPE, Paulo Alves. Imajen/Mídia SEFOPE

DILI, 09 marsu 2021 (TATOLI)–Relasiona desizaun Konsellu Ministru nian ne’ebé aplika serka sanitária iha minisípiu Dili hahú hosi loron 09 to’o 15 marsu, maka funsionáriu no kargu xefia hosi Sekretaria Estadu Formasaun Profisionál no Empregu (SEFOPE) deside halo serbisu iha uma.

“Ami agora iha uma hotu kedan hodi kumpre serka sanitária iha Dili, ne’ebé Governu fó sai desizaun horiseik,” Diretór Jerál Empregu SEFOPE, Paulo Alves informa ba Agência TATOLI, via telefónika, tersa ne’e.

Notísia relevante: SEFOPE iha inisiativa realiza teste swab ba funsionáriu hotu

Dadaun ne’e  seidauk iha desizaun foun ida atu funsionáriu sira halo serbisu hanesan bain-bain, tanba ne’e funsionáriu sira utiliza meiu komunikasaun hodi komunika ba malu.

“To’o agora seidauk iha desizaun ruma hosi Sekretáriu Estadu, bainhira iha serbisu sira ne’ebé presiza tebes atu halo maka telefone ba malu no karik nesesáriu bele halo iha edifísiu Caicoli maibé labele halibur ema. Agora bele manda informasaun hosi WhatsApp, Facebook no seluk tan. Ita uza meiu sira ne’e, liu-liu ligasaun ho aprovizionamentu, ita bele kontaktu hodi solusiona ba kestaun nesesáriu sira,” nia akresenta.

Parte SEFOPE mós la halo atendimentu ba  kandidatu traballadór sira ho situasaun atuál.

“Ita hotu tenke kumpre desizaun Governu, agora ami hein orientasaun hosi Sekretáriu Estadu, maibé ami hotu iha uma no prevene labele envolve ema barak  iha serbisu fatin,” nia hatutan.

Antes ne’e, iha domingu (07/03), Sala Situasaun Sentrru Integradu Jestaun Krize (CIGC, sigla portugés) anunsia katak hosi teste masál ba abitante 289 iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, deteta ema na’in-rua pozitivu COVID-19, ne’ebé pasiente ida hanesan funsionáriu SEFOPE.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here