AIFAESA halo inspesaun no konfirmasaun folin foos iha estabelesimentu komersiál iha Dili, tersa (09/03). Imajen/AIFAESA

DILI, 10 marsu 2021 (TATOLI)—Autoridade Inspesaun Fiskalizasaun  Atividade Sanitária no Alimentár (AIFAESA) halo inspesaun iha terrenu no simu informasaun hosi kompañia distributór, katak folin foos iha Dili normál no laiha mudansa.

“Foin daudaun  ami halo enkontru ho sira (kompañia distributór) no sira ko’alia mai ami katak sira-nia foos kilograma 20 ho folin $10,50 no kilograma 25 ho folin $25,50,” Diretór Operasaun AIFAESA, Gabriel da Costa, informa ba Agência TATOLI, via telefónika, kuarta ne’e.

Tuir Diretór ne’e, situasaun surtu COVID-19 afeta ba mundu tomak, tanba ne’e folin foos iha nasaun orijen sa’e oituan.

“Nasaun orijen ne’ebé prodús foos hasa’e folin foos sira ne’e tanba konta ho transportasaun foos mai iha ita-nia rai no selu taxa, tanba ne’e kompañia distribuitór hasa’e foin foos oituan maibé nafatin hela ho 10%, la liu hosi ne’e,” nia esplika.

Notísia relevante: MTKI husu públiku labele pániku, foos sufisiente ba konsumu nasionál

Tuir dekretu lei 29/2011,  kona-ba presu justu, kuandu kompañia sira fa’an $10 to’o $15, konsidera iha 10% no kategoria normál.

“Maibé kuandu sira fa’an to’o $18  to’o $19, piór liu fa’an to’o $20, ida-n’e AIFAESA sei halo investigasaun tanba liu ona 10% ka liu ona presu justu. Tanba ne’e, hafoin distributór sira garante presu foos  ne’e entaun kontinua mantein,” nia akresenta.

Espekulasaun folin foos iha postu Fatumean konsidera krime

Diretór Opersaun fundamenta, situasaun ne’ebé akontese iha postu administrativu Fatumean, munisípiu Covalima, ne’ebé operadór ekonómiku sira hanesan kios no loja hasa’e folin foos $17 to’o $20, konsidera hanesan krime.

“Ami sei halo atuasaun no halo ona kontaktu ho autoridade lokál atu identifika fatin refere, hodi nune’e ami  tun halo intervensaun tuir lei haruka,” nia hatutan.

Notísia relevante: Foos saka 680 ba komunidade iha Fatumean la sufisiente

Antes ne’e, bainhira AIFAESA halo inspesaun no konfirmasaun presu foos iha loja no distributór sira, nota kata presu foos normál hanesan kondisaun antes aplika serka sanitária.

Presu foos ne’ebé kompañia distributór aprezenta ba AIFAESA, ho marka Lafaek kilograma 25 $13,50, kilograma 30 $15.50, Kuda Ulun kilograma 25 $13,25, kilograma 30 $15,50, Globus kilograma 25 $12,50, Folsom kilograma 15 $10,50 to’o $11, kilograma 20 $14 no Raja Pulen kilograma 15 $14.

Hosi konfirmasaun ne’e hatudu katak daudaun distributór hirak ne’e laiha stock foos iha armazen, maibé distributór ninia foos daudaun atraka ona iha Portu Dili, enkuantu seluk iha stock maibé uza ba programa Cesta Bázika.

Distributór seluk konfirma katak foos importadu sei to’o iha fulan marsu nia laran.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here