Ministru Turizmu, Komérsiu no Indústria, José Lucas do Carmo da Silva, hamutuk ho ekipa, konvoka enkontru ho kompañia distributór, iha sala enkontru MTKI, Bebora, segunda (08/03). Imajen/Mídia MTKI

DILI, 09 marsu 2021 (TATOLI)--Ministériu Turizmu, Komérsiu no Indústria (MTKI) husu ba públiku, liuliu abitante Dili, atu labele pániku tanba stock foos iha armazen Sentru Lojístika Nasionál (CLN, sigla portugés) no distributór sira sufisiente ba konsumu nasionál.

Ministru Turizmu, Komérsiu no Indústria, José Lucas do Carmo da Silva, hateten Governu hanesan reguladór, fasilitadór no fizkalizadór, iha dever bolu antesaun kompañia sira nu’udar distribuidór hodi serbisu hamutuk hatan  komunidade sira-nia nesesidade loron-loron.

“MTKI apela ba públiku atu labele pániku, parte Governu nian iha armazen CLN  iha tonelada  28.000,” Ministru José Lucas informa, hanesan haktuir iha nota ne’ebé Agência TATOLI asesu, tersa ne’e.

Notísia relevante: Stock nasionál sufisiente, CLN garante Timor-Leste la krize ai-han

Minsitru hato’o kestaun ne’e, hodi rejeita informasaun ne’ebé espalla iha públiku katak stock foos menus no foli ai-han iha merkadoria sa’e maka’as tanba impaktu aplikasaun medida ezekutivu relasiona ho evolusaun surtu COVID-19, ne’ebé da’et ona ba komunidade iha munisípiu Covalima (Fatumean no Tilomar) no Bobonaro.

Nune’e,  Ministru hatutan kona-ba regra ne’ebé liga ho ministériu sira seluk, relasiona ho sasan nessesidade povu nian, presiza iha liña komunikasaun ne’ebé di’ak, atu nune’e bele rezolve problema ho apropriadu, imediata hodi atende ho éfikas.

Haree no análiza ba situasaun ne’e, Ministériu Turizmu Komérsiu Indústria liuhosi Diresaun Nasionál Regulamentu Komersiál no Protesaun Konsumedór, halo intervensaun norekolla dadus imediata hosi parte hotu, atu iha serteza katak sasan esensiál ba nesesidade povu nian labele sa’e.

“Stock foos iha maibé lakohi fa’an ba públiku hodi hasa’e folin, hahalok hanesan ne’e la tuir regra no fó impaktu ba komunidade iha territóriu Timor-Leste tomak,” dehan Ministru.

Nune’e, iha loron 08 marsu, Ministru José Luca o ninia ekipa konkova urjente ho kompañia distributór sira hodi hatene pontu situasaun no bele hatene klaru kona-ba stock ai-han no folin foos atuál iha estabelesimentu komersiál sira.

Kompañia distributór esplika katak tanba pániku ho kazu surtu COVID-19 maka komunidade ba sosa foos to’o saka barak, no negosiante hasa’e folin oituan entre $0,25 to’o $0,50, tanba ró ne’ebé tula foos mai mós hasa’e folin.

Daudaun ne’e, kompañia Alva-Lili nia stock foos iha armazen tonelada  500 no tonelada 1.000 to’o 1.500 sei tama iha semana ida-ne’e.

Kompañia distribuitór Perisos nian  foos ne’ebé sobu ona iha portu tonelada 6.800, no fulan oin sei tama tan tonelada  8.600.

Kompañia Lisun iha stock foos tonelada 700, ne’ebé prepara ba programa Cesta Bázika no prepara atu hatama tan tonelada 5.000.

Entretantu, kompañia supermerkadu hanesan W-four, Dili-Mart, Timor-Top no Start King nia produtu fa’an ho folin normál

Nune’e mós, sasán nesesidade baziku ne’ebé importa mai la’o ho di’ak hela tanba impaktu hosi kompañia kontributór selu kustu ró, no hasa’e folin la liu 10 to’o 15%  tuir lei ne’ebé vigora ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here