Pesoál saúde halo swab ba Ministru Prezidénsia Konsellu Ministru, Fidelis Manuel Leite Magalhães, (08/03/21). Imajen Tatoli/Jogerjo Guterres.

DILI, 09 marsu 2021 (TATOLI)—Desde Marsu 2020 to’o oras ne’e, Timor-Leste (TL) seidauk iha kazu pozitivu COVID ho kategoria moderadu no grave, ne’ebé presija hetan atendimentu intensivu hosi médiku-sira.

Koordenadór  Forsa Tafera  Prevensaun  Mitigasaun Surtu COVID-19 Timor Leste, Rui Maria de Araújo, esplika kazu sira ne’ebé TL iha ho kategoria lizeiru katak, detetadu pozitivu laiha síntoma, maibé  lori ba izolamentu  atu evita moras ne’e labele da’et ba ema seluk.

Notísia Relevante:COVID-19: pozitivu 13, baixa aumenta ba 48

“Ema ne’ebé pozitivu COVID-19 moderadu no grave mak tenke hetan atendimentu intensivu no presiza oksijéniu tanba iis boot,”  Rui Maria de Araújo esplika iha Centro Convenções Dili, tersa ne’e.

Nia rekoñese katak, durante ne’e pasiente barak preokupa kona-bá atendimentu, balun la satisfeitu ho mekanizmu atendimentu tanba sente la moras, maibé nia dehan, problema rezultadu análiza deteta virus ne’e iha hela ema ne’e nia isin.

Médiku ne’e hakarak klarifika mós katak, durante ne’e médiku sira halo atendimentu ba pasiente normalmente antes pasiente tama sala izolamentu, médiku fó kedan orientasaun atu pasiente idaidak sukat rasik ninia-temperatura no hato’o fila-fali verbalmente ka liu hosi whatsApp ho objetivu atu evita kontaktu besik liu ho pesoál saúde.

“Ida ne’e protokolu  padraun ne’ebé mak utiliza iha fatin hotu-hotu,  no ita uza tinan ida ona. Banihira pasiente ida laiha síntomas ne’ebé todan, nia bele la’o bá mai,  nia bele halo atividade hanesan baibain no importante mak tenke hadook an atu labele kontaktu ho ema seluk,’’ nia esklarese.

Esplikasaun ne’e Rui Maria de Araújo hakarak klarifika ba públiku, liuliu bá pesoál ne’ebé  espresa ninia sentimentu no kontesta liuhosi  vídeo no oras ne’e virál iha média sosiál.

Entretantu, dadus loron ohin-nian, kazu foun 13, kazu rekoperadu 0,  kazu ativu 48.

Notísia Relevante:COVID-19: rezultadu teste swab ba PM no membru Governu negativu

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here