Pesoál saúde halo teste swab ba Primeiru-Ministru, Taur Matan Ruak, iha salaun MF, Aitarak-laran, segunda (08/03). Imajen/Mídia GPM

DILI, 09 marsu 2021 (TATOLI)–Ekipa konjunta saúde munisípiu Dili halo teste swab ba Primeiru-Ministru (PM), Taur Matan Ruak, ho membru Governu sira inklui funsionáriu sira iha gabinete ministériu, iha segunda (08/03), hafoin reuniaun Konsellu Ministru estraordinária iha edifísiu Ministériu Finansa, Aitarak-laran, nune’e rezultadu ne’ebé fó sai negativu.

Vise-Koordenadora Forsa-Tarefa ba Prevensaun no Metigasaun Surtu COVID-19, Odete da Silva Viegas, hateten teste ba membru Governu sira ho rezultadu ezeme laboratóriu hatudu katak negativu.

“Ekipa konjunta saúde munisípiu Dili halo teste swab ba membru Governu sira tanba Diretór Jerál ida hosi ministériu balun pozitivu, ne’ebé posibilidade iha mós kontaktu ho membru Governu sira iha loron hirak liubá, entaun teste ne’e hatudu ezemplu di’ak tanba hakarak kontribui. Felizmente rezultadu teste sira barak mak negativu ona inklui mós asesór no seguransa pesoál sira,” Vise-Koordenadora relata liuhosi konferénsia imprensa iha Sentru Konvensaun Dili (CCD, sigla portugés), tersa ne’e.

Notísia relevante: Membru Governu tomak submete ba teste swab

Atuál Diretora Jerál Prestasaun Saúde hosi Ministériu Saúde (MS) ne’e dehan, maski nune’e instituisaun balun seidauk iha rezultadu hanesan Teknolojia Informasaun no Komunikasaun, Institutu Públiku (TIC,I.P), maibé sei fó sai iha tempu badak.

“Sentru Integradu Jestaun Krize alerta kuandu iha pozitivu, maibé kuandu laiha pozitivu signifika katak rezultadu sira sai mai ne’e mós konserteza negativu hotu,” nia akresenta.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here