Situasaun kapitál Dili iha loron dahuluk implementasaun serka sanitária, tersa (09/03). Imajen TATOLI/Egas Cristóvão

DILI, 09 marsu 2021 (TATOLI)--Hafoin Konsellu Ministru aprova rezolusaun Governu númeru 12/2021, 08 marsu ne’ebé impoin serka sanitária no konfinamentu obrigatóriu iha munisípiu Dili durante loron hitu nia laran, maka iha loron 09 dadeer, movimentu ema inklui transporte públiku no privadu hahú menus iha dalan.

Desizaun ezekutivu entra em vigor hahú oras 00:000 loron 09 to’o 15 marsu 2021, hodi fó biban ba ekipa saúde ho akompañamentu autoridade seguransa halo vijilánsia saúde, buka kontaktu besik infetadu COVID-19 no teste swab iha kapitál Dili.

Loja iha kapitál Dili, iha loron dahuluk implementasaun serka sanitária, kontinua fasilita fatin fase liman iha estabelesimentu komersiál, tersa (09/03). Imajen TATOLI/Egas Cristóvão

Tuir observasaun Agência TATOLI iha terrenu, movimentu ema ho transporte hahú menus tanba komunidade sira konsiente no hakarak kumpre desizaun Governu, maski iha loja, ofisina inklui transporte privadu hanesan motór no karreta balun kontinua halo movimentu.

“Ha’u lori motór sai tanba ha’u bá hola nesesidade bázika iha loja Audian, maibé hafoin hola, ha’u fila ona uma, tanba Governu impoin ona serka sanitária iha munisípiu Dili,” Martinho Pereira hateten ba Agência TATOLI iha Audian, Dili, tersa ne’e.

Notísia relevante: Reuniaun KM: deside serka sanitária iha Dili durante loron hitu

Tuir nia, desizaun Governu ne’e pertinente tebes hodi bele evita kontájiu surtu COVID-19.

Situasaun movimentu ema no transporte iha estrada Palásiu Governu oin, tersa (09/03). Imajen TATOLI/Egas Cristóvão

Biban hanesan, Maria Lopes, sai ba hola sasán iha loja hodi nesesidade uma laran durante semana ida.

“Ita tenke kumpre desizaun Governu, tanba ne’e di’ak ba ita-nia saúde, família no populasuan Timor-Leste,” nia afirma.

Tuir observasaun Agência TATOLI iha terrenu, nota katak transporte públiku balun kontinua tula pasajeiru.

Enkuantu, Polísia Nasionál Timor-Leste (PNTL) hahú halo check point iha área Tasi-tolu, Becora no Lahane, inklui Manleu-Beduku atu hapara movimentu ema no transporte hosi Dili bá munsípiu  seluk no hosi munisípiu seluk mai Dili.

Durante serka sanitária, bandu abitante iha Dili sai ba munisípiu seluk no fó biban ba ema hosi munisípiu seluk tama Dili maibé labele sai ona to’o aplikasaun medida ezekutivu ramata.

Situasaun movimentu transporte iha estrada área Igreja Motael, Faról, tersa (09/03). Imajen TATOLI/Egas Cristóvão

Movimentu bá-mai akontese ho kondisaun emerjénisa hanesan transporta ai-moruk ho seguransa sira, ho autorizasaun Ministériu Interiór no Sala Situasaun sentru integradu Jestaun Krize (CIGC, sigla protugés).

Desizaun Governu mós impoin konfinamentu obrigatóriu, ne’ebé la autoriza sidadaun sira atu halo atividade kulturál, relijioza no sosiál seluk durante períodu loron hitu nia laran.

Nune’e mós, la autoriza atu sai hosi hela fatin bá fatin públiku sira sein iha nesesidade, maibé bele sai kuandu iha nesesidade hola ai-han, sosa pulsa eletrisidade ou sosa medikamentu sira, no bainhira la’o maka pesoál seguransa sira halo auto stop karik sidadaun tenke fó justifikasaun.

Aleinde medida jerál ba territóriu tomak liuhosi aplikasaun Estada Emerjénsia (EE), Governu halo mós medida ba zona espesiál sira liuhosi rezolusaun Governu, katak serka sanitária no konfinamentu obrigatóriu ne’e vale de’it iha munisípiu Dili inklui Ataúro no Metinaro, enkuantu munisípiu seluk bele halo atividade loron-loron, maibé nafatin kumpre medida EE.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here