Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 09 marsu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes hateten, ohin, ekipa Ministériu Saúde (MS) sei halo teste (swab) ba deputadu/a no funsionáriu sira iha Parlamentu Nasionál hodi kontribui ba medida prevensaun surtu COVID-19.

Notísia Relevante: Reuniaun KM: deside serka sanitária iha Dili durante loron hitu

“Depois plenária ida-ne’e, orsida lokraik sei iha teste (swab) no laiha esesaun ba funsionáriu, deputadu, tékniku, asesór, seguransa, motorista hotu ekipa Ministériu Saúde nian sei mai halo hotu teste swab ohin kedas,” Prezidente Parlamentu Nasionál, Deputadu Aniceto Longuinhos Guterres Lopes, aviza liuhosi plenária Parlamentu Nasionál.

Nia fó-sai katak, aban, kuarta-feira suspende atividade loron ida atu bele halo dezinfetante totál ba iha resintu Parlamentu Nasionál nian.

“Komesa bainrua nein deputadu, funsionáriu no áte ema públiku sira-ne’ebé atu mai parlamentu tenke teste kedas ba temperatura iha portaun,” nia dehan.

Nia hatutan, ekipamentu kona-ba dezinfetante ne’e hetan oferta hosi Organizasaun Saúde Mundiál nune’e bele kontrolu iha resintu Parlamentu Nasionál nian.

Prezidente Parlamentu Nasionál ne’e hateten, ne’e nu’udar medida prevensaun ida hasoru propagasaun surtu COVID-19 no hein katak deputadu sira hotu bele kumpre regra hirak-ne’e hotu.

Ohin mós, Prezidente Prezidente Parlamentu Nasionál ne’e konvoka kedas reuniaun líder bankada parlamentár estraordinária atu bele aviza kumpre medida prevensaun, liuliu distansiamentu sosiál, uza máskra no fase-liman beibeik ho sabaun nune’e hamutuk kolabora no halo prevensaun másimu iha área Parlamentu Nasionál nian

“Ne’e nu’udar saúde di’ak ba deputadu no funsionáriu sira hotu. Se orsida teste mak balu pozitivu karik, ita haruka kedas halo tratamentu kedas ka halo konfinamentu obrigatóriu kedas,” Prezidente PN fó-sai.

Hafoin teste swab, Prezidente Parlamentu Nasionál ne’e avizaa, hahú kinta-feita kontrola iha resintu Parlamentu Nasionál rigorozu liután.

Prezidente Parlamentu Nasionál ne’e hateten, parlamentu tenke funsiona normál maibé atu suspende funsionamentu normál ida-ne’e tenke desizaun plenária, la’ós desizaun mesak-mesak.

“Até balun telefone ha’u atu suspende atividade hotu, tanba ne’e liga ho funsionamentu normál nian prezidente parlamentu labele deside mesak no laiha kompeténsia atu suspende atividade no funsionamentu parlamentu ninian,” nia subliña.

Notísia Relevante: Reuniaun KM: aprova roteiru vasinasaun kontra COVID-19

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here