Hare iha Atabae. Imajen TATOLI/António Gonçalves

DILI, 04 marsu 2021 (TATOLI)—Sentru Lojístika Nasionál (CLN, sigla portugés) garante stock nasionál foos sufisiente atu hatán ba nesesidade povu iha situasaun ne’ebé nasaun hotu taka pontu entrada ba movimentu sasán no ema tanba COVID-19.

“Ita garante tanba CLN  hola parte iha Estadu, fiar katak laiha problem ba ai-han no ita sei absolve produtu iha rai-laran, tantu liuhosi stock armazen, setór privadu no agrikultór rai-laran, ne’ebé bainhira laiha dalan, ita uza meiu G to G atu hetan nafatin produtu mai rai-laran,” Prezidente CLN, Agusto Junior Trindade, hateten ba Agência TATOLI, via telefónika, kinta ne’e.

Antes ne’e, iha jullu 2020, Governu halo akizisaun foos tonelada 30.000 hosi Vietname no montante ne’e la inklui ho foos ne’ebé importa hosi setór privadu no produsaun rai-laran.

“Ita iha stock nasionál tonelada 30.000, maibé antes ne’e ita hasai ona tonelada 1.000 ba Ministériu Solidaridade Sosiál (MSSI) ba ajuda umanitária no Sekretaria Estadu Protesaun Sivíl (SEPS) tonelada 2.000-resin hodi tulun komunidade afetadu ba dizastre naturál,” nia akresenta.

Nia dehan, falta tonelada 28.000 foin daudaun Ministériu Koordenadór Asuntu Ekonómiku (MKAE) hasai despaisu husu CLN halo intervesaun merkadu ba fatin afetadu ba serka sanitária hanesan Bobonaro Covalima, inklui Rejiaun Administrativa Espesál Oé-cusse Ambeno (RAEOA) hamutuk tonelada 5.000.

“Agora ita iha foos iha stock nasionál hamutuk tonelada 23.000-resin,” nia hatutan.

Tuir responsável ne’e, iha posibilidade CLN bele hatama tan foos  lokál ou foos hosi rai-li’ur, haree ba prioridade Governu ne’ebé hakarak absolve uluk produsaun rai-laran.

“Iha abríl nia rohan ita sei halo kolleta dahuluk, signifika produsaun sei sa’e, tanba daudaun mós tempu udan,” nia tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here