Diretór Jerál Empregu SEPFOPE. Paulo Alves Imajen TATOLI/Egas Cristovão

DILI, 07 marsu 2021 (TATOLI)—Sekretaria Estadu Formasaun Profisionál no Empregu (SEFOPE) hakarak hola inisiativa hodi koordena ho ekipa saúde, halo teste swab ba funsionáriu hotu iha edifísiu Caicoli.

Inisiativa ne’e, relasiona ho informasaun ne’ebé fó sai hosi Sala Situasaun Sentru Integradu Jestaun Krize (CIGC, sigla portugés) kona-ba kazu pozitivu COVID-19 rua ne’ebé deteta hosi teste masál ba abitante 289 iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, hanesan ajente administrasaun públika ne’ebé serbisu iha ministériu balun.

Notísia relevante: COVID-19: CIGC blokeia temporária aldeia Terra Santa tanba deteta pozitivu-rua

Ba kestaun ne’e, Diretór Jerál Empregu SEFOPE, Paulo Alves, komunika ona ho Sekretáriu Estadu Formasaun Profisionál no Empregu, Alarico do Rosário, atu halo teste ba funsionáriu sira.

“Ha’u hanoin teste swab hanesan inisiativa de’it, se funsionáriu SEFOPE mak hetan duni moras COVID-19, di’ak liu funsionáriu hotu tuir teste,” Diretór Jerál informa ba Agência TATOLI via telefónika, domingu ne’e.

Tuir nia, funsionáriu ne’ebé konfirmadu pozitivu COVID-19 serbisu iha Gabinete Inspesaun Auditoria Interna SEFOPE.

“Ohin, kolega sira pasa info iha grupu no ha’u mós asesu, nune’e ha’u mos telefone ona ba Xefe Gabinete Inspeksaun Auditoria Interna no konfirma katak ninia funsionária ida hela iha BTN II, Tasi-tolu, pozitivu COVID-19 no daudaun lori ona ba sala izolamentu Vera Cruz,” nia dehan.

Ho kazu foun rua ohin, kazu pozitivu COVID-19 hamutuk 122 no hosi númeru ne’e, na’in-98 mak rekuperadu no kazu ativu hamutuk 28 sei baixa iha sala izolamentu Vera Cruz.

Ema ne’ebé submete ba teste to’o agora hamutuk 22.651, ne’ebé hosi númeru ne’e iha 22.054 mak negativu no hein rezultadu 475.

Jornalista: Domingos Piedade Freitas

Editora: Jullia Chatarina

HAKEREK NO HATÁN

Please enter your comment!
Please enter your name here