Vendedór sira tuur no hamrik hein hela sira-nia modo ne’ebé faan iha Merkadu Taibesi, kuarta (09 setembru 2020). Imajen TATOLI/António Gonçalves.

DILI, 09 marsu 2021 (TATOLI)—Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, hateten durante iha situasaun serka sanitária ne’e merkadu sira iha Munisípiu Dili sei la taka maibé husu komunidade ba merkadu tenke aplika nafatin protokulu saúde nian. 

Nia hateten, hahú ohin parte Jestaun merkadu Munisípiu Dili nian fó orden ona ba koordenador merkadu sira, nune’e bele haree movimentu merkadu oinsá la’o tuir regra protokolu hosi ministériu saúde nian liuliu durante iha situsaun serka sanitaria ne’e.

 “Durante serku sanitária merkadu munisípiu Dili hanesan Taibesi no Manleuana, kontinua loke nafatin. Tanba ne’e husu vendedór ka kompradór sira tenke tuir nafatin regra hosi Organizasaun Mundiál Saúde (OMS) nian ne’ebé fó sai iha Ministériu Saúde, katak uza máskara, fase liman ho sabaun ka hand sanitaizer, no distansiamentu sosiál. Maibé bainhira la halo tuir regra sira-ne’e mak ami deside sei haruka ka duni-fila tantu kompradór ka vendedór,” Berta Santa Gonçalves Vieira hateten ba Agência TATOLI liuhosi telefónika, tersa ne’e.

Parte Jestaun Merakdu Munisípiu Dili, nia dehan, tenke foti medida haruka fila komunidade bainhira ba merkadu la tuir regra protokolu saúde nian no Jestaun Merkadu servisu tuir orientasaun hosi superiora rasik, entaun durante semana ida jestaun merkadu tenke foti medida ne’ebé bele fó vantajen ba ema hotu.

 “Ita haree situasuan COVID-19 uluk no agora la hanesan. Uluk lockdown ba nasaun maibé agora lockdown tanba iha ona trasminsaun lokál liuliu iha Munisípiu Dili. Entaun, medidade ne’ebé foti oinsá komunidade hotu bele halo tuir nune’e bele redus númeru transmisaun lokál,” nia hateten.

Nia afirma, regra sira-ne’ebé daudaun ne’e aplika iha Merkadu Taibesi no Manleuana mak hanesan vendedór ka kompradór sira to’o merkadu antes atu faan ka sosa sasán tenke uza máskara, fase liman ho sabaun ka hand sanitaizer, no distansiamentu sosiál

“Regra ida seluk mak ita haree vendedór ka kompradór sira ba merkadu mínimu ema ida de’it. Vendedór ema ida ba faan mak troka malu no kompradór sira ema ida mak lori transporte labele na’in-rua tula malu,” nia dehan.

Nia dehan, regra sira-ne’ebé aplika bazea ba reuñiaun esktraorinária hosi Konsellu Ministru 08 marsu 2021, deside tiha ona Serka Sanitária no konfinamentu obrigatóriu ba munisípiu Dili, hahú hori kalan 00h00 to’o oras 15 marsu 2021, proibe atu realiza kualkér atividade sira-ne’ebé ho karátér sosiál, kultura, desportiva no relijioza ne’ebé labele halibur malu.

“Entaun presiza ita hotu nia konsiésnia no kolaborasaun tuir nafatin protokolu saúde nian, nune’e bele evita númeru tansmisaun lokál,” nia hateten.

Jornalista: Arminda Fonseca 

Editór: Cancio Ximenes 

HAKEREK NO HATÁN

Please enter your comment!
Please enter your name here