Korpu Bombeiruhala'o intervensaun ba insendiu balun. Imajen TATOLI/António Gonçalves

DILI, 09 marsu 2021 (TATOLI)-Hala’o servisu todan no risku boot hanesan Korpu Bombeiru, la’ós atu atende de’it inséndiu sira, maibé hola parte mós ba  prevensaun no salvasaun ba ema nia vida.

Servisu iha Bombeiru, idéntiku ona ho mane-sira nia servisu tanba uza fíziku. Maibé, iha Timor-Leste feto lubun ida mós agrupa iha servisu ho risku boot ne’e.

Notísia Relevante : SEPS sei rekruta pesoál Bombeiru 96

Tuir dadus hosi Diresaun Nasionál Bombeiru, hatudu katak daudaun ne’e iha territóriu  nasionál, inan-feto hamutuk na’in-26 maka agrupa iha korpu Bombeiru.

Intervensaun Bombeiru iha terrenu. Imajen TATOLI/António Gonçalves

Umbelina de Jesus Marçal, Lourença Alves Araújo no Maria Imaculada Tilman,   nu’udar  feto forte hanesan ho sira-nia feto maluk na’in-23 seluk iha Korpu Bombeiru, ne’ebé saran ona sira-nia vida  serve nasaun  ho moto Bombeiru nian ‘’Prontu atu Serve’’.

Liuhosi dada-lia ho Agência Tatoli, tersa ne’e, iha edifísiu Bombeiru, Caicoli, Dili, Lourença Alves Araújo, espresa nia orgullu serve Estadu ida-ne’e liuhosi knar hanesan pesoál  servisu Korpu Bombeiru hanesan ho maluk mane sira.

Nia dehan, kna’ar ida-ne’e espesífiku no umanizmu tebes tanba bele fó an tomak hodi salva ema seluk nia vida iha inséndiu ka dezastre naturaís ho dezastre seluk.

“Ha’u sente servisu iha Bombeiru hanesan anju ida tanba lori ami nia vida ba salva ema seluk nia vida bainhira hasoru dezastre ka inséndiu ruma,’’ Lourença Alves Araújo haktuir.

Nia hateten, nu’udar feto situasaun ne’ebé enfrenta la’ós kaman, maibé todan tebes dala-barak hasoru ho fasilidade limitadu bainhira halo atuasaun inséndiu hodi hamate  iha sosiedade. Maibé tanba servisu iha korpu ida entre mate ho feto halo balansu hodi halo todan sira ne’e sai kaman.

“Importante maka servisu ho foku, kalma no pasiénsia. Todan hotu bele sai kaman no ita bele enfrenta situasaun perigu sira ho fasil,” Lourença Alves Araújo  hateten.

Luorença ho nia feto-maluk Umbelina de Jesus Marçal ho Maria Imaculada Tilman, tatoli ba feto-maluk iha territóriu nasionál atu la bele neon-kraik no ta’uk. Sira dehan, servisu saida de’it maka tula mai feto-maluk sira  kabas buka atu halo ho domin no responsabilidade, nune’e iha nia finalidade bele fó rezultadu ida di’ak.

Iha  ámbitu loron mundiál feto, 08 marsu 2021, Lourença, Umbelina ho Maria, enkoraja  feto-maluk sira atu ejerse knaar saida de’it no buka aprende hosi saida de’it   hodi alkansa susesu sira  ho lema “feto mós bele”.

Istória estabelese Bombeiru

Intervensaun korpu Bombeiru iha terrenu. Imajen Tatoli/António Gonçalves

Bombeiru hanesan instituisaun Estadu nian ne’ebé harii iha Novembru 1999 ho naran Komissão de Apoio para a Transição de Timor-Leste (CATT).

CATT ne’e integra iha misaun UNTAET  (United Nation Transitory Administration in East Timor) iha novembru 1999 nia laran sira halo rekrutamentu ba Timoroan sira iha munisípiu  tolu hanesan, Dili, Baucau no Aileu atu sai nu’udar Bombeiru Timoroan.

Iha tempu ukun aan Servisu Nasionál Bombeiru hamriik iha tinan 2002, hosi Governu Tranzitóriu UNTAET ne’ebé  xefia hosi Saudozu Sérgio Vieira de Mello ho naran Fire Rescue and Emergency Services (Serviço de Incêndio, Salvamento e Emergência) ho objetivu atu ajuda sidadaun hotu ho nia  misaun mak atu fó garantia ba prestasaun no seguransa ba sidadaun hotu nia vida no sira-nia sasán, hamate ahi ne’ebé han uma, ai-laran ka floresta, indústria no fó mós asisténsia ba asidente rodoviáriu no halo mós salvamentu iha area rurál, sidade laran, industrial, no fó apoiu ba komunidade ne’ebé hasoru dezastre naturaís.

Durante ne’e Bombeiru halo kooperasaun ho nasaun sira seluk hanesan Portugál, Indonézia, Singapura ho sira seluk hodi haruka membru sira  tuir formasaun ba hadi’a rekursu umanu, ho formasaun espesializada ka formasaun kontinua, atu nune’e, bele iha kapasidade no koñesimentu no halo jestaun ida ne’ebé di’ak ba  susesu servisu Bombeiru nian iha terrenu.

Atu iha espetativa servisu Bombeiru ho di’ak liután maka presiza ekipamentu sira hanesan atuasaun ba dezastre ho natoon no adekuadu ba  atendimentu ba dezastre sira ho eskala boot ho di’ak liután.

Jornalista       : Nelson de Sousa

Editór              : Francisco Simões

HAKEREK NO HATÁN

Please enter your comment!
Please enter your name here