Atividade iha sala plenária Parlamentu Nasionál. Imajen TATOLI/António Gonçalves.

DILI, 09 marsu 2021 (TATOLI)—Reprezentante Povu iha uma fukun Parlamentu Nasionál propoin ba Governu atu aplika konfinamentu obrigatóriu (lockdown) totál iha territórriu nasionál tanba konfinamentu iha parte balun hamosu implikasaun barak.

Notísia Relevante: Ohin, ekipa MS halo teste swab ba deputadu sira iha PN

Deputadu Bankada FRETILIN, José Agustinho Siqueira ‘Somotxo’, hateten transmisaun lokál ne’e akontese mak Governu deside blokeia Bobonaro, Covalima no Rejiaun Administrativa Espesiál Oé-Cusse Ambeno (RAEOA).

Tanba ne’e, nia dehan, Governu tenke fó preokupasaun boot ba lockdown ka serka santitária ne’e no Governu mós tenke kumpre. Nia parte preokupa ho konfinamentu obrigatóriu iha Munisípiu Dili tanba órgaun hotu-hotu sei servisu hela.

Reprezentante Povu ne’e husu Governu haree didi’ak fali desizaun nune’e moras ne’e labele da’et ba ema tomak.

Deputadu Bankada FRETILIN ne’e preokupa, se serka sanitaria ne’e aplika de’it iha Dili laran tomak, entaun aban bainrua sei halai tuir nafatin moras ne’e iha-ne’ebé.

“Tuir ha’u-nia opiniaun loloos ne’e lockdown ne’e loron 15 ka fulan-ida, povu tomak tenke halo sakrifísiu katak lockdown iha Timor-Leste tomak. Tanba, nasaun sira seluk ne’ebé lockdown kuandu moras ne’e mosu iha fatin ida mak lockdown, ne’e mak ninia konsekuénsia boot ne’ebé akontese iha Portugál,” nia levanta liuhosi plenária, tersa ne’e.

Deputadu Somotxo fó hanoin ba Governu, Parlamentu Nasionál no Prezidente Repúblika tenke haree fila-fali desizaun ba konfinamentu obrigatóriu ne’e.

“Se lockdown ne’e Dili de’it ka tenke iha Timor-Leste tomak. Ba ha’u-nia haree ne’e, di’ak liu ba Timor-Leste tomak nune’e ita bele hatene moras ne’e iha ona ne’ebé,” Deputadu Somotxo fó hanoin ba Governu.

Entretantu Deputadu Bankada Partidu Libertasaun Populár (PLP), Abel Pires da Silva, sekunda preokupasaun Deputadu Somotxo nian.

“Ita aplika serka sanitária iha Dili, hori kalan ema barak mak fila ba sira-nia munisípiu entaun agora hamosu problema foun no ita tenke halo teste ba ba munisípiu hotu-hotu, nune’e ita bele hatene populasaun ne’ebé sai horisehik no horikalan ne’e keta halo lori virus ne’e ba sira-nia munisípiu,” nia dehan.

Tanba, tuir nia, iha indikasaun ne’ebé mak forte katak akontese ona transmisaun komunitária, kazu ida iha Bebonuk ne’e Sentru Integradu no Jestaun Krize (CIGC-sigla portugés) mós la hatene mai hosi ne’ebé.

Nia fó hanoin ba Ministériu Saúde atu halo teste ba territóriu nasionál tanba relasiona ho komunidade hosi kapitál Dili ba fali munisípiu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here