Pesoál saúde halo swab ba Ministru Prezidénsia Konsellu Ministru, Fidelis Manuel Leite Magalhães, (08/03/21). Imajen Tatoli/Jogerjo Guterres.

DILI, 08 marsu 2021 (TATOLI)--Membru VIII Governu Konstitusionál, hahú hosi Primeiru-Ministru (PM), Taur Matan Ruak no Vise-PM na’in-rua hamutuk ho governante sira seluk submete hotu ba teste swab, hafoin reuniaun Konsellu Ministru estaordinária.

Ministru Prezidénsia Konsellu Ministru, Fidelis Manuel Leite Magalhães, hateten teste ne’ebé ekipa saúde sira halo ba membru Governu tomak tanba pasiente pozitivu COVID-19 na’in-rua ne’ebé mak deteta ne’e nu’udar funsionáriu iha instituisaun Estadu, no durante ne’e posibilidade iha kontaktu besik mós ho membru ezekutivu hirak ne’e.

“Ekipa saúde halo teste swab ba membru Governu sira atu iha serteza katak sira asegura no la infetadu COVID-19 tanba governante sira iha altu risku tanba kontinua nafatin serbisu iha situasaun hanesan ne’e,” Ministru Fidelis relata hafoin reuniaun ezekutivu iha Ministériu Finansa (MF), Aitarak-laran, segunda ne’e.

Notísia relevante: SEFOPE iha inisiativa realiza teste swab ba funsionáriu hotu

Inisiativa ne’e mosu mós tanba nota katak durante ne’e sira-ne’ebé infetadu ninia distánsia ba membru Governu la dook

“Tanba ne’e iha posibilidade katak ema hirak pozitivu partisipa ona iha reuniaun sira ho membru Governu, no mós membru gabinete hosi ministru sira ne’e nia, entaun atu iha serteza katak sira la infetadu maka importante tebes atu iha konfirmasaun hosi teste ne’e,” Portavós Governu esplika.

Nia hatutan, ramata teste governante sira ne’e, idaidak sei fila ba uma hodi hein rezultadu hosi teste.

Iha domingu kalan (07/03), Sala Situasaun Sentru integradu anunsia kazu pozitivu ne’ebé deteta iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili, ne’ebé antes ne’e ekipa saúde halo teste ba abitante  hamutuk 289 iha área ne’e.

Ho kazu foun rua, maka kazu pozitivu COVID-19 ne’ebé deteta iha Timor-Leste hahú marsu 2020 to’o horiseik hamutuk 122 no hosi númeru ne’e, na’in-98 mak rekuperadu no kazu ativu hamutuk 28 sei baixa iha sala izolamentu Vera Cruz.

Hosi kazu pozitivu COVID-19 to’o oras ne’e, na’in-92 deteta iha Dili, Covalima 17, Bobonaro neen no Baucau ida.

Ema ne’ebé submete ba teste to’o agora hamutuk 22.651, ne’ebé hosi númeru ne’e iha 22.054 mak negativu no hein rezultadu 475.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here