Deputada Bankada Fretilin, Josefa Álvares Pereira Soares. Imajen/Egas Cristovão.

DILI, 08 marsu (TATOLI)—Deputada Bankada Frente Revolusionária Timor-Leste Independente (FRETILIN), Josefa Álvares Pereira Soares, hateten partidu polítiku (Parpol) sira tenke hatuur iha estatutu hodi fó porsaun ba feto nia envolvimentu iha polítika.

Notísia Relevante: Deputada Maria Angelina husu Governu konsidera feto iha prosesu rekrutamentu

Josefa Álvares Pereira Soares hateten, luta feto nian sei naruk liután no sei dura nafatin bainhira ema hotu-hotu laiha karáter ne’ebé hanesan atu bele implementa no atinje justisa sosiál.

Nia fó ezemplu, justisa sosiál iha igualdade iha pozisaun polítiku sira, nune’e identifika feto potensiál sira-ne’ebé merese lidera instituisaun ida tenke konsidera.

“Ha’u hanoin partidu polítiku sira tenke hatuur iha sira-nia estatutu, katak parte ruma tenke fó porsaun ba iha feto, selae ita bolu igualdade jéneru sei la konsege atinje,” Deputada Josefa Álvares Pereira Soares informa ba Agência TATOLI relasiona ho loron internasionál ba feto ne’ebé selebra iha kada loron 8 marsu, iha uma fukun PN, segunda ne’e.

Deputada ne’e seidauk haree partidu polítiku hatuur porsaun ba feto sira iha polítika, maioria pozisaun importante sira okupa hosi mane.

Nia subliña, se situasaun iha partidu polítiku la fó porsaun ba feto, di’akliu lalika ko’alia kona-ba igualdade jéneru tanba la hatudu iha prátika governasaun.

Nia hatutan, maske Timor-Leste iha ona kuadru legál kona-ba lei kontra violénsia doméstika, maibé justisa sosiál ne’e seidauk balansu tanba la komprimenta ho didi’ak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here