Amostra hosi teste swab Imajen Tatoli/Eugénio Pereira

DILI, 08 marsu 2021 (TATOLI)—Sala Situação Centro Integrado Gestão de Crises (SS-CIGC sígla portugés) fó-sai tan kazu pozitivu COVID-19 foun neen hosi bairru BTN II, Tasi-tolu no ida hosi Bebonuk, Suku Madohi, Postu Administrativu Dom Aleixo, Munisípiu Dili.

Koordenadór Forsa-Tarefa ba Prevensaun no Mitigasaun COVID-19, Rui Maria de Araújo, hateten kazu hitu ne’e ekipa konjunta saúde hetan, hafoin buka-tuir kontaktu-besik hosi kazu rua ne’ebé deteta iha bairru BTN II, Tasi Tolu, Suku Madohi foin lalais ne’e.

Notísia Relevante:Reuniaun KM: deside serka sanitária iha Dili durante loron hitu

“Ita deteta tan kazu neen hosi kontaktu-besik, ba kazu ida ne’ebé ita detekta iha bairru BTN II.  Hosi mós ezersísiu rastreiu aleatóriu ne’ebé halo ba grupu risku balun, deteta mós kazu ida tan iha Bebonuk,” Rui Maria de Araújo fó-sai liuhosi konferénsia imprensa iha Centro Convenções Dili, segunda ne’e.

Nia dehan, ekipa konjunta saúde buka tuir mós kontaktu-besik iha área Bebonuk, no rekolla hamutuk amostra 55, totál amostra ba ohin nian ne’ebé  rekolla hamutuk 300-resin, rezultadu sei fó-sai iha loron tuir-mai.

Dadus ba loron ohin nian iha kazu foun hitu, rekoperadu 0, kazu ativu 35.

Parte SS-CIGC mós apela nafatin ba públiku, liuliu populasaun iha Dili laran, atu nafatin kalma, lalika pániku, halo tuir regra konfinamentu domisiliáriu jerál, ba populasaun rezidente iha Munisipiu Dili, ne’ebé sei hahú orsida madrugada, zero oras, tuir buat ne’ebé porta-voz Konsellu Ministrus nian anunsia tiha ona.

SS-CIGC husu populasaun Timor-Leste tomak, liu-liu iha munisípiu sanulu seluk ho RAEOA atu tu’ur hakmatek iha fatin, matan-moris neon na’in nafatin, pratíka nafatin medida sira hanesan uza máskara, fase liman beibeik ho sabaun, bainhira kumprimenta-malu la presiza ka’er liman, evita halibur-malu barak, hamri’ik do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here