Inan-feton sira pesoál saúde hala'o servisu iha situasaun pandemia COVID-19 iha Munisípiu Covalima. Imajen Tatoli/Eugénio Pereira

COVALIMA, 08 marsu 2021 (TATOLI)- Inan-feton hirak ne’ebé asume profisaun hanesan pesoál saúde hola responsabilidade ho risku ne’ebé boot, liuliu iha situasaun propagasaun COVID-19.

Hanesan inan-feton Dionísia Amaral, nu’udar médika jerál Ministériu Saúde (MS), Meliana Rika nu’udar téknika Laboratóriu Nasional MS,    Natalicia Concenção da Silva, médika jerál vijilánsia Epidemolojia, Merita da Silva Oliveira, médika jerál Vijilánsia Epidemolojia ho Faviola Domingas Nunes, nu’udar Saúde Públiku Vijilánsia Epidemolojia. Sira-hotu hamutuk ho mediku (mane-maluk) sira tenke hola risku boot entre família no profisaun iha propagasaun peste letál COVID-19 ne’ebé nakda’et (transmisaun komunitáriu) ona iha Munisípiu Covalima.

Notísia Relevante : Pasiente COVID-19 tanis husik hela família

Ba komemorasaun Loron Feto Mundiál, 08 marsu 2021, Agência Tatoli halo entrevista direita ho inan-feton pesoál saúde sira iha Covalima ne’ebé sai inspirasaun boot hodi haktuir sira-nia esperiénsia kmanek no moruk durante atende direita pasiente  COVID-19, hahú hosi halo teste screening masál,  fó asisténsia saúde to’o halo evakuasaun hosi  pasiente sira iha Postu Administrativu Fatumean no Postu Administrativu Tilomar, Munisípiu Covalima mai Sentru Izolamentu Vera Krús, Dili.

Medika Jerál Ministériu Saúde, Dionísia Amaral. Imajen Tatoli/Eugénio Pereira

Dionísia Amaral, nu’udar Medika Jerál Ministériu Saúde, hateten nu’udar médiku hanesan responsabilidade boot ne’ebé sira tane aas iha sira-nia misaun maka salva pasiente sira-nia vida. Tanba ne’e, atu risku ne’e boot oinsá no tenke arriska sira-nia vida iha pandemia COVID-19 mós sira simu ho liman-rua tanba sira obedese ba  juramentu ho lema “A saúde do meu doente será a minha primeira preocupacão”.

“Sentimentu ne’ebé ha’u sente hodi hasoru luta kombate COVID-19 ida ne’e, primeiru nu’udar umanu ha’u ta’uk, tanba moras ne’e akontese iha mundu tomak no moras ne’e hanesan pandemia mundiál ne’ebé hamate ema barak iha mundu,” Dionísia Amaral hateten.

Mezmu sentimentu ne’e hafalun ho ta’uk, maibé Dionísia Amaral esforsu kontra nia ta’uk rasik hodi enfrenta situasaun ne’e atu bele bali povu hosi propagasaun COVID-19 o soi povu ne’e hosi mate tanba de’it peste letál ne’e.

Esperiénsia moruk ne’ebé Dionísia Amaral ho nia kolega ekipa vijilánsia epidemolojia no laboratóriu saúde sira enfrenta durante atende pvou hodi enfrenta situasaun COVID-19 iha Covalima maka bainhira hala’o evakuasaun ba pasiente COVID-19 feto na’in-rua ho inisiál SC, tinan 35, no SCA, tinan 10, nu’udar família ida hosi pasiente COVID-19 MCA, tinan 42.

Pasiente COVID-19 SC ho tanis lakohi ba Sentru Izolamentu Vera Krús Dili, tanba lakohi husik nia oan na’in neen (6) hela mesak iha uma no razaun seluk maka la iha família atu haree nia oan sira.

Haree ba preokupasaun ne’e, obriga Dionísia ho nia kolega médiku sira ho sentimentu emosionál deside evakua mós sira nia oan na’in (6) ba hela iha kuarentena Covalima para ekipa médiku observa direita nia saúde.

“La fasil ba pasiente COVID-19 sira atu hasoru moras ida ne’e, tanba feen no la’en no sira nia oan feto ki’ik ida tinan 10 mós pozitivu COVID-19 lakohi atu koopera, maibé ami nafatin fó korajen ba sira katak, ami hasees ita-boot sira hosi ita-boot sira nia uma hodi próteze ita-boot sira nia saúde no evita  hada’et ba oan sira no hada’et ba sosiedade,” nia konta tuir.

Teknika Laboratóriu Nasionál de Saúde Ministériu Saúde, Meliana Rika. Imajen Tatoli/Eugénio Pereira

Meliana Rika, Téknika Laboratóriu Nasionál  Saúde, Ministériu Saúde, haktuir atu salva no próteze povu nia saúde hosi risku COVID-19 sai nu’udar misaun importante ba médiku hotu- hotu  iha mundu.

Mezmu durante ne’e ema balun kritika servisu pesoál saúde hodi la fiar katak, COVID-19 eziste iha Timor-Leste, maibé nu’udar médiku Meliana Rika ho nia kolega médiku sira seluk sempre konsola povu atu fiar katak, COVID-19 akontese iha mundu no Timor-Leste mós rejista kazu no presiza halo prevensaun hodi kumpre regra saúde públiku nian.

“Ami tun ba baze ema barak la fiar no dehan COVID-19 ne’e la iha, maibé ami sempre halo teste hodi informa ba povu sira katak, rezultadu teste moras ne’e eziste duni, tanba ne’e ami husu povu atu fiar de’it ba ami parte saúde, tanba moras ne’e hamate ema barak ona no ita tenke halo prevensaun,” Meliana Rika tenik.

Durante hala’o servisu, Meliana Rika ho ekipa saúde sira hotu husik hela família no oan sira iha Dili, maibé iha tempu livre  sempre kontaktu ba família atu raja ba malu hodi tulun misaun servisu ne’ebé sira halo iha Timor-Leste ba povu Timor-Leste.

Família ekipa médiku sira ne’ebé destaka iha Covalima sempre hela ho ta’uk no preokupa  maibé ba Meliana Rika ho nia kolega sira sempre fó hanoin no korajen ba família sira atu hakmatek, kalma no la bele pániku.

“Ita reja ba malu atu Maromak fó nia beran bali ita hosi situasaun sira hotu mak ita atu enfrenta iha ita-nia moris loroloron nian,” Meliana Rika hateten.

Medika Jerál Vijilansia Epidemologia, Natalicia Concenção da Silva. Imajen Tatoli/Eugénio Pereira

Médika Jerál Vijilánsia Epidemolojia, Natalicia Concenção da Silva dehan, luta kontra COVID-19 la’ós responsabilidade médiku nia mesak, maibé presiza konsensa ema hotu nian atu kumpre regra protokolu saúde nian ne’ebé Ministériu Saúde no Organizasaun Mundiál Saúde (OMS) haktuir ona.

Evita halibur malu, distánsia fízika, fase-liman ho sabaun no uza máskara, sai hanesan regra ida ne’ebé obrigatóriu atu ema hotu kumpre hodi evita propagasaun peste letál COVID-19 ne’ebé  oho ona ema ua’in iha mundu.

Natalicia dehan, teste swab COVID-19 ne’ebé sira rekolla hanesan aktu prevensaun para deteta sedu sintoma COVID-19 ne’ebé mosu bele halo prevensaun urjénsia hodi evita povu halo movimentu hosi fatin ida ba fatin seluk.

Medika Jerál Vijilansia Epidemologia, Merita da Silva Oliveira. Imajen Tatoli/Eugénio Pereira

Médika Jerál Vijilánsia Epidemolojia, Merita da Silva Oliveira, fó sasin mós katak knaar durante ne’e sira ekipa halo maka rekolla amostra screening ba abitante maka identifika iha sintoma COVID-19, médiku sempre halo kedas asaun prevensaun hodi konsola pasiente no família sira bele hetan tratamentu saúde ho di’ak iha fatin izolamentu ka kuarentena.

Tuir nia, COVID-19 hanesan inimigu boot ida ne’ebé susar ema atu haree, maibé liuhosi teste swab bele haree ema ida ninia rezultadu hodi prova rezultadu negativu ka pozitivu.

Nia hatutan, tratamentu saúde ba ema moras sira presiza kalma, fó sujestaun atu pasiente hetan tratamentu intensivu no labele diskrimina ema.

Saúde Públiku Vijensia Epidemologia, Faviola Domingas Nunes. Imajen Tatoli/Eugénio Pereira

Faviola Domingas Nunes, Saúde Públiku Vijensia Epidemologia, agradese servisu ne’ebé sira halo hodi rekolla amostra screening hetan partisipasaun másimu hosi komunidade no autoridade lokál, maski komunidade balun lakohi koopera.

Ekipa médiku kompostu ema na’in 20-liu kompostu hosi balun destaka hosi  Dili no balun iha Covalima  lidera hosi Medikál Sientista, António Sales no Xefe Ekipa Vijilánsia no Epidemolojia ho Laboratóriu Munisípiu Covalima, Serafin Moniz.

To’o segunda dadeer ne’e, pasiente pozitivu COVID-19 ne’ebé rejistu hosi Covalima hamutuk ema na’in-sia (9), kompostu hosi mane na’in-hitu (7) iha Aldeia Klauhalek, Mane Kiik, Baleu ne’ebé pertense ba Suku Belulik Leten, Postu Administrativu Fatumean no na’in-tolu (3) hosi família ida iha Aldeia Onu Laran, Suku Maudemo, Tilomar, Covalima.

Dadus kona-ba inimigu importadu invizivel COVID-19 ne’e, ekipa Vijilánsia no Epidemolojia ho Laboratóriu Ministériu Saúde deteta liuhosi rekolla teste screening masál ba COVID-19 ne’ebé hala’o ona hosi loron 16 fevereiru to’o loron o6 marsu, no sei kontinua halo screening masál ba oin iha Covalima ho amostra 3000-liu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here