Membru Unidade Patrullamentu a Fronteira (UPF) no Médiku sira halo evakuasaun ba pasiente COVID-19 ho inisiál MM ne’ebé fila hosi natar ho tanis iha Aldeia Mane Kiik, Suku Belulik Leten, Postu Administrativu Fatumean, Munisípiu Covalima. Imajen Tatoli/Eugénio Pereira

COVALIMA, 05 marsu 2021 (TATOLI)- Inan-feton na’in-rua (bin-alin) nu’udar pasiente pozitivu COVID-19 trauma no tanis bainhira Unidade Patrullamentu Fronteira (UPF) hamutuk ho Ekipa Vijilánsia no Epidemolojia ho Laboratóriu Munisípiu Covalima ba foti sira obrigatóriu hosi sira nia horik fatin transporta mai Izolamentu Vera Krús, Dili.

Bainhira atu sa’e karreta ambulánsia multifunsaun ne’ebé para hein ona iha sira-nia uma-oin, sesta (05/03), bin-alin ne’e tanis hateke ba família sira.

Notísia Relevante : COVID-19: pozitivu lima hosi Covalima, ida hosi Baucau

Bin-alin ho inisiál FM, tinan 31, no LSN, tinan 15,  ne’e nu’udar pasiente pozitivu COVID-19 iha Aildeia Baleo, Suku Belulik Leten, Postu Administrativu Fatumean-Covalima.

Sira-nain rua tanis tanba hanoin sira nia avó feto, tinan 86, ho oan mane-ki’ik, tinan sia (9), ne’ebé hela mesak iha sira nia uma.

“Ami rua (bin-alin) ba tiha Dili, koitadu, se mak bele haree ha’u nia oan, tanba ami nia mama ferik ona, oinsá ho ha’u nia oan,” FM hateten ho matanbeen bainhira leba pasta atu  sa’e karreta ambulánsia.

Iha momentu hanesan, pasiente COVID-19, LSN nu’udar mós Estudante ida iha Eskola Bázika ida iha Fatumean, tanis tanba rona informasaun hosi médiku katak, nia ho nia bin pozitivu COVID-19.

Haree ba situasaun tristeza ne’e, Ekipa Médiku Ministériu Saúde ne’ebé lidera hosi Medikál Sientista, António Sales no Xefe Ekipa Vijilánsia no Epidemolojia ho Laboratóriu Munisípiu Covalima, Serafin Moniz deside pasiente COVID-19 lori mós nia oan mane ba Dili hodi bele besik liután nia inan durante hala’o tratamentu saúde.

Ekipa médiku Ministériu Saúde rua ne’e mós fó korajen no akonsellamentu ba  pasiente sira atu labele tanis no trauma, tanba desizaun hodi lori sira ba hala’o tratamentu intensivu iha Dili hodi bele salva sira nia vida no evita mós transmisaun lokál peste letál COVID-19.

“Imi labele tanis, tanba desizaun ne’ebé ami foti atu salva imi nia vida no família ho viziñu sira,” Serafin Moniz lia tun ba pasiente na’in-rua ne’e.

Pasiente ho inisiál MM (feto ida), tinan 16, hosi Aldeia Mane Kiik, ne’ebé hala’o hela atividade ajuda nia inan-aman kuda hare iha natar-laran, hakfodak, trauma no tanis bainhira  autoridade seguransa no médiku sira ba buka tuir nia hodi anunsia rezultadu teste swab katak, nia mós pozitivu COVID-19.

Pasiente ne’e akompaña hosi nia bin no família la’o hosi natar-laran ho kondisaun tanis la’o ba uma atu prepara ropa hodi arranka ba Dili, maibé tanba kondisaun ambulánsia nakonu hodi tula ona pasiente COVID-19 na’in tolu ho inisiál MA tinan 47, FM tinan 31 no MM tinan 16 no labarik ki’ik ida, tanba ne’e ekipa médiku deside, pasiente MM ne’e sei transporta ba Dili, sábadu (06/03).

Rejista Tan Pasiente Ida Pozitivu COVID-19

Iha tuku 17:00 kalan, ekipa médiku sira fó sai rezultadu teste swab identifika abitante mane ida, tinan 28, hosi Aldeia Mane Kiik, Postu Fatumean, pozitivu COVID-19. Nune’e dadus totál pasiente COVID-19 agora aumenta ba ema na’in 16.

Tuir observasaun Agênsia Tatoli nian iha Covalima, ekipa médiku sira kontinua rekolla mós amostra swab ba família no viziñu sira ne’ebé hela besik ho pasiente COVID-19 iha área Aldeia Fatumea, ho Suku Belulik -Leste nian inklui mós Xefe Suku Belulik Leten tanba halo kontaktu direita ho pasiente COVID-19 balun.

Tuir planu, sábadu (06/03), ekipa médiku sira kontinua tama-sai komunidade nia uma hodi rekolla amostra swab, inklui estudante sira ho profesór sira iha Eskola Bázika Sentrál Fatumean.

 Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here