Xanselér (Canceler) Arkidioseze, Padre Paulus Maya, enkontru ho Komandu Polísia Munisípiu Dili, kinta (04/03/2021). Imajen Tatoli/Nelson de Sousa

DILI, 04  marsu 2021 (TATOLI)-Arsebispu ba Arkidioseze Dili,  Mgr. Virgílio do Carmo da Silva, SDB, delega Padre Paulus Maya, nu’udar Xanselér (Canceler) Arkidioseze Dili, kinta ne’e, hasoru malu ho Komandu Polísia Nasionál Timor-Leste (PNTL) Munisípiu Dili (KMD), Superintendente Xefe,  Henrique da Costa ho  segundu komandante Superintendente Euclides Belo, iha Komandu Munisípiu Dili, hodi konsulta kona-ba lala’ok no rekizitu sira Estadu Emerjénsia da-XI nian.

Amu Paulus Maya  hateten, Arkidioseze Dili konsulta ho Komandu Munisípiu Dili, liuliu hatu hatene kle’an pontu balun ne’ebé iha relasaun ho reuniaun  no liberdade ba kultu nian.

Notísia Relevante : Prezidente Repúblika dekreta Estadu Emerjénsia ba dasanulu-resin-ida

Nia hatutan, baibain Arkidioseze Dili kuandu iha ona implementasaun EE foun  Amu Bispu sempre konvoka reuniaun ho konsellu episkopál  atu  halibur hanoin no ikus mai hamosu komunikadu ida atu fó ba territóriu tomak Arkidioseze Dili  nian kompostu hosi Munisípiu  neen hanesan Dili, Ermera, Aileu, Ainaro, Same no Oe-Cusse.

“Importante tebes atu iha informasaun no orientasaun  ida ne’ebé klaru, atu nune’e, komunikadu ida ne’e Arkidioseze Dili sei hasai bele tulun sarani sira tuir regra hodi halo prevensaun ba COVID-19 hanesan mantén distansiamentu sosiál, fase-liman beibeik, uza máskara no seluk tan,’’ Amu Paulus Maya  hateten ba jornalista

Ho enkontru ne’e parte delegasaun Dioseze Dili sei relata fila-fali ba Amu Bispu Dili hodi bele hasai fila-fali orientasaun ruma ba parte balun Dioseze nia kontrolu hodi halo prevensaun ba COVID-19.

Komandante PNTL Munisípiu Dili, Superintendente Xefe, Henrique da Costa, hateten iha enkontru ne’e parte seguransa  informa ba Dioseze Dili katak nafatin garante seguransa ba atividade hotu no nafatin husu kumpre regra hosi Organizasaun Mundiál Saúde (OMS) ho Ministériu Saúde (MS) atu oinsá kontribui atu bele prevene COVID-19.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here