Seremónia pose Diretór Nasionál Promosaun Dezenvolvimentu Mídia Lokál, Paulino Quintas, iha salaun PCM, Palásiu Governu, sesta (05/02). Imajen/Natalino Costa

DILI, 05 marsu 2021 (TATOLI)–Sekretáriu Estadu Komunikasaun Sosiál, Merício Juvinal dos Reis ‘Akara’ fó pose ba Diretór ba Diresaun Nasionál Promosaun Dezenvolvimentu Mídia Lokál (DNPDML) foun, Paulino Quintas.

Iha biban ne’e, Sekretáriu Estadu Akara enkoraja Diretór foun lidera diresaun foun ne’ebé tutela ba SEKOMS ho di’ak no profisionál.

“Tanba diresaun ne’e foun, entaun tenke diskute planu, estratejia, programa no atividade ho di’ak atu hetan susesu, nune’e diresaun foun ne’e bele la’o la’ós de’it iha Dili, maibé bele to’o munisípiu hotu,” governante ne’e hateten, hadoin seremónia pose iha salaun Prezidénsia Konsellu Ministru, Palásiu Governu, sesta ne’e.

Notísia relevante: Diretór sesante DNPDML entrega termu serbisu ba SECOMS

Nia rekoñese esperiénsia ne’ebé Diretór foun ne’e iha área mídia, tamba ne’e nia parte fó konfiansa tomak.

“Ha’u iha konfiansa ba Diretór foun tanba iha esperiénsia barak no fó parabéns tanba hetan ona fiar, ha’u hanoin nia la’ós ema foun tanba kleur ona serbisu iha área mídia, tanba ne’e konfiansa ne’e merese,” nia akresenta.

Iha fatin hanesan, Diretór Nasionál Promosaun Dezenvolvimentu Media Lokál emposadu, Paulino Quintas, hateten durante mandatu sei foka ba kestaun tolu.

“Ha’u hanesan Diretór foun ne’ebé foin simu pose, ho ekipa sei haree planu asaun annuál 2021 hosi Diretór sesante no dahuluk iha tempu badak ami sei konsolida rekursu umanu ho fasilidade no ekipamentu, tanba bainhira halo programa tenke iha fasilidade ne’ebé suporta,” nia dehan.

Daruak maka ami sei halo diskusaun kle’an kona-ba programa ne’ebé SEKOMS planeia iha planu asaun annuál.

Ikus liu, maka sei implemeta programa ne’ebé eziste ona no kanaliza program sira to’o iha munisípiu.

Antes ne’e, DNPDML lidera hosi Abel da Conceção, maibé iha loron 23 fevereiru simu ona pose nu’udár Administradór munisípiu Aileu.

DNPDML hanesan diresaun ne’ebé foin eziste iha tinan ne’e, ne’ebé antes ne’e hanesan Sentru Rádiu Komunidadade (CRC, sigla portugés).

Diresaun ne’e mosu atu sai motór ba dezenvolvimentu mídia iha munisípiu, ne’ebé Governu liuhosi SEKOMS hakarak konsentra hamutuk autoridade munisipál dezenvolve sentru mídia atu diversifika meiu komunikasaun soiál iha área rurál no ninia implementasaun liuhosi DNPDML.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here