Sekretária Estadu Igualdade no Inklusaun, Maria José da Fonseca Monteiro de Jesus. Imajen Tatoli/ António Goncalves.

DILI, 05 marsu 2021 (TATOLI)—Sektretária Estadu Igualidade no Inkluzasaun (SEII), Maria José da Fonseca Monteiro de Jesus, hataten komemorasaun Loron Mundiál Ba Feto ne’ebé sempre selebra iha 08 marsu ne’e objetivu atu valoriza feto-nia direitu.

Notísia Relevante: Feto potensiál iha vida sosiál-polítika sei mínimu

“Ita hatene katak Loron Mundiál Ba Feto ne’e, ita komemora atu valoriza feto-nia luta no direitu, igualidade no valoriza susesu feto nian iha área oioin,” Maria José da Fonseca Monteiro de Jesus hateten ba Agência TATOLI relasiona ho komemorasaun Loron Mundiál Ba Feto ne’ebé mundu selebra iha kada loron 08 marsu, iha nia knaar fatin, Obrigado Barrack, Matadouru, Dili, sesta ne’e.

Nia hateten, komemorasaun Loron Mundiál Ba Feto ne’e la’os liuhosi festa maibé koko atu nafatin fó oportunidade no hamosu oportunidade oioin ba feto no labarik feto sira, ba komponente vulnerável sira atu bele partisipa ativa iha dezenvolvimentu nasionál.

“Ita hotu-hotu iha dever atu asegura katak feto no labarik feto sira, maluk portadora defisiente no Lesbiian, Gay, Bisexual, Transjender no Intersex (LGBTI), ferik, katuas labele sai tan ba vítima violénsia saida de’it. Komponente vulnerável sira atu bele partisipa ativa iha dezenvolvimentu nasionál,” nia dehan.

Membru Governante ne’e hateten, atu redús violénsia saida de’it tenke enkoraja sira no fó oportunidade ba sira atu bele partisipa iha nivél foti desizaun iha kargu oioin ne’ebé sira bele foti dezisaun sein iha impaktu ba sira-nia moris.

“Tanba ne’e, ita hotu-hotu iha família tenke asegura katak oan-feto no oan-mane sira hetan tratamentu hanesan no asesu ba edukasaun. Se iha riku-soin atu fahe ba oan sira, tenke fahe hanesan. Atu nune’e, sira mós bele dezenvolve aan hanesan iha oportunidade atu hadi’a sira-nia moris no sira bele ajuda inan-aman no fó orgullu ba família bainhira sira susesu iha sira-nia moris,” nia hateten.

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here