Xefe Suku Bemori, Cristalina Perreira Soares de Oliveira. Imajén/Osória Marques

DILI, 05 Marsu 2021 (2021)—Xefe Suku Bemori, Postu Administrativu Nain Feto, Munisípiu Dili, Cristalina Pereira Soares de Oliviera, hateten feto nia papél importante tebes iha família no nasaun maibé iha Timor-Leste ne’e feto potensiál iha vida sosiál, ekonómia no polítika sei mínimu tanba sei kesi ho sistema patriarkál (mane domina liu).

Notísia Relevante: SEII kontinua fó advokasia ba feto potensiál sira sai lideransa

“Ha’u haree katak ita feto potensiál iha iha vida sosiál polítika no fatin importante sira-ne’e sei mínimu liu, tanba iha Timor-Leste sistema patriarkál mak kesi metin no susar ba feto sira atu dezenvolve-aan iha vida sosiál, ekonómia no polítika,” Cristalina Pereira Soares de Oliveira hateten ba Agência TATOLI relasiona ho Loron Mundiál Ba Feto ne’ebé mundu selebra iha kada loron 08 marsu, iha nia knaar fatin, Sede Suku Bemori, Dili, sesta ne’e.

Tanba ne’e, xefe suku ne’e husu ba Prezidente Parlamentu atu feto foinsa’e ne’ebé reprezenta feto iha uma fukun PN atu tau netik hanoin ba feto foinsa’e ne’ebé durante ne’e hala’o hela sira-nia moris iha agrikultura, no feto iha área remota ne’ebé nunka asesu ba informasaun kona-ba feto.

“Papél feto-nian importante tebes iha familia, sosiedade no nasaun. Ita feto responsavél tebes ba ita-nia familia. Bainhira ita sai lideransa ida, hanesan ha’u asume hela xefe suku ne’ebé mak lidera ha’u-nia komunidade, no hodi serví ba nasaun Timor-Leste,” nia hateten.

Bainhira sai Xefe Suku Bemori, nia hateten, nia sente onradu tanba povu bele fó fiar ba nia atu sai na’i-ulun tanba nia iha kapasidade natoon hodi lidera suku refere.

“Ha’u hanoin sai xefe suku ne’e iha nia di’ak no aat mós. Ba ha’u di’ak, tanba ita bele fahe ideia ba malu entre lideransa ho Governu no komunidade kona-ba dezenvolvementu ba povu no rai ida-ne’e,” nia dehan.

Ezemplu, nia dehan, bainhira komunidade iha problema hanesan problema feen-laen, problema rai, problema joven no seluk tan,xefe suku tenke servisu hamutuk ho polísia, delegadu, Konsellu Polisia Komunitária (KPK) atu rezolve.

Nia dehan, responsabilidade xefe suku sira-nian iha Timor-Leste ne’e mak hanesan roda ba dezenvolvimentu ba nasaun ne’e nian, tanba nasaun atu hakmatek ne’e hosi xefe suku no xefe aldeia sira-nia kontribuisaun.

“Liga ho loron feto internasionál, ha’u husu ba Governu atu selebra mós iha munisípiu atu nune’e bele eleva no kapasita ita-nia maluk feto sira-nia koñesementu. Atividade ne’e labele halo de’it iha nasionál tanba iha remota mós iha feto matenek no feto potensiál,” xefe suku ne’e rekomenda.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here