Sekretária Estadu Igualdade no Inklusaun, Maria José da Fonseca Monteiro de Jesus. Imajen Tatoli/ António Goncalves.

DILI, 02 fevereiru 2021 (TATOLI)–Sekretária Esatdu Igualidade no Inkluzaun (SEII), Maria José da Fonseca Monteiru de Jesus, hateten Governu prontu nafatin asegura feto potensiál sira ba iha pozisaun lideransa.

Notísia Relevante: Movimentu Feto Potensiál Hakarak Halo Mudansa

Nia hatutan, polítika Governu nian hahú hosi Governu dahuluk to’o ohin loron hakarak partisipasaun feto iha prosesu oioin no mós atu asegura feto sira ba iha pozisaun lideransa hosi nasionál to’o nivel lokál.

“Ami nafatin enkoraja malu maluk feto sira atu bele hamriik no kandidata-aan konkorre ba iha pozisaun oioin. Ami akompaña no fó nafatin advokasia ba feto potensiál sira atu sai lideransa. Hanesan ita hatene katak iha Munisípiu Dili no Ainaro iha maluk feto balun konkorre ba lideransa munisípiu nian, entaun ami kontinua enkoraja sira,” Maria José da Fonseca Monteiru de Jesus, hateten ba jornalista sira iha Salaun Suai Room, Timor-Plaza, Dili, tersa ne’e.

Nia afirma, Governu nafatin koko halo advokasia no kria kondisaun ne’ebé di’ak ba maluk feto potensiál sira bainhira hasoru diskriminasaun iha prosesu ruma maibé mós Governu labele obriga sira atu sai lideransa iha progresu oioin.

“Entaun bainhira iha prosesu ruma sira hasoru diskriminasaun, SEII koko atu ko’alia ba parte oioin no kontinua halo advokasia atu nune’e ida-ne’e labele akontese. Maibé mós ita labele obriga feto sira tenke ba kandidata–aan sai lideransa maibé tanba buat hotu prosesu tomak halo ho kuaze iha méritu mak foin hakat ba oin. Ita motiva maibé labele obriga,” nia hateten.

Membru Governu ne’e hateten, ho baze méritu katak ba kompete haree ema-nia méritu mak liu ka laliu, maibé klaru katak durante ne’e la ko’alia kona-ba igualidade la’ós kualidade jéneru de’it maibé ekuiti mós tanba hakarak atu asegura katak ema la’os hetan de’it oportunidade maibé hetan oportunidade atu prepara-aan ba kompete.

“Ita loke de’it konkursu maibé ita fó mós oportunidade atu ema prepara nia aan entaun dala ruma ne’e sai dezvantajen ida mós ba maluk feto sira. Tanba ida-ne’e mak durante ne’e ami koko servisu hamutuk ho asosiasaun feto potensiál iha munisípiu hotu no mós iha Rejiaun Administrativa Espesiál Oé-Cusse Ambeno (RAEOA), hodi haree oinsá mak ita bele prepara maluk feto sira hodi bele prepara aan hasoru oportunidade oioin ne’ebé mosu maibé depende mós ba organizasaun asosiasaun feto potensiál sira,” nia esplika.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here