Chinese Merchants Union Associasaun Timor-Leste (CUAT), ohin, halo asaun solidariedade hodi fó apoiu ba komunidade Munisípiu Covalima. Imajen TATOLI/Arminda Fonseca.

DILI, 05 marsu 2021 (TATOLI)—Chinese Merchants Union Association Timor-Leste (CUAT), ohin, halo asaun solidariedade fó apoiu foos saku 70 ba komunidade Munisípiu Covalima.

Notísia Relevante: PN husu Governu halo intervensaun urjénsia folin foos iha Covalima

Reprezentante Asosiasaun CUAT, Laurence Su, hateten objetivu fó apoiu foos saku 70 ba komunidade Covalima ne’e tanba daudaun ne’e Munisípiu Covalima Lockdown ka serku sanitaria, entaun komunidade prezisa nesesidade bazika.

“Ami hosi Asosiasaun xineza Timor-Leste ka CUAT, hato’o ami-nia solidaridade ba maluk komunidade Covalima, ne’ebe daudaun ne’e iha situasaun lockdomn, entaun ami apoiu liuhosi foos saku 70,” Laurence Su hateten ba jornalista sira hafoin entrega foos ba Administradór Munisípiu Covalima, iha sede RENETIL, Farol, Dili, sesta ne’e.

Nia dehan, apoiu ne’ebé sira halo tanba hetan informasaun hosi sira-nia xefe, katak komunidade Covalima presiza hetan apoiu ai-han, entaun sira apoiu ho foos, nune’e bele fahe ba komunidade iha Covalima.

Nia dehan, apoiu ne’ebé sira halo ne’e sei la to’o ohin de’it maibé bainhira de’it mak komunidade Covalima husu tan apoiu sira prontu nafatin apoiu ho saida de’it.

Foos saku 70 ne’ebé Asosiasaun CUAT apoiu ba komunidade Suai-Covalima daudaun ne’e sei rai hela iha Salaun RENETIL, tanba foos sira-ne’e balun sei lori ba Covalima no balun mós sei fahe ba estudante Covalima-oan sira ne’ebé hela iha Dili.

Iha fatin hanesan, Administradór Munisípiu Covalima, Francisco de Andrade, hato’o agradese ba apoiu ne’ebe hosi asosiasaun sira ajuda ona tanba daudaun ne’e komunidade Covalima presiza ema hotu nia apoiu liuliu ba ai-han ninian.

“Ami Agradese tebes ba apoiu ne’ebé ami hetan. Maibé, ami mós hato’o agradese ba parte hotu-hotu katak daudaun ne’e komunidade Covalima presiza ema hotu nia tulun, tanba situasaun ne’ebé komunidade Covalima hasoru agora ne’e defísil tebes,” nia dehan.

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here