Amostra hosi teste swab. Imajen Tatoli/Eugénio Pereira.

COVALIMA, 05 marsu 2021 (TATOLI) – Ekipa Ministériu Saúde no Sala Situasaun Sentru Integradu Jestaun Krize (SS-CIGC) rejista tan kazu foun hosi abitante na’in-haat (4) pozitivu COVID-19 iha Aldeia Baleo ho Mane Kiik, Suku Belulik Leten, Postu Administrativu Fatumean, Munisípiu Covalima.

Ho númeru foun abitante na’in-haat ne’ebé pozitivu COVID-19 halo númeru COVID-19 iha Covalima rejista ona ema na’in-14 no família balun ne’ebé kontaktu ho pasiente submete ba konfinamentu obrigatóriu.

Pasiente COVID-19 na’in haat ne’e kompostu hosi feto na’in-tolu no mane ida, ne’ebé ekipa Ministériu Saúde rekolla  sira-nia amostra teste screening masál COVID-19 iha tersa (02/03/2021).

Notísia Relevante : Governu orienta re-teste etapa daruak ba abitante Fatumean

Dadus ne’ebé Agência Tatoli hiha Covalima katak pasiente COVID-19 foun sira ne’e iha relasaun família ho pasiente COVID-19 na’in-neen ne’e hala’o halo hela tratamentu saúde iha Sentru Izolamentu Vera Krús, Dili.

Tuir informasaun katak abitante sira ne’e mós halo vizita klandestina ba área Indonézia nian hodi sosa sasán nesesidade báziku.

Sirkunstánsia jeográfika iha liña fronteira Suku Belulik Leten-Fatuemean-Covalima ne’ebé sai palku ba “importasaun klandestina” COVID-19 baliza ho Postu Tasi Feto Belu Indonézia ho distánsia kilómetru 2,8.

Alende ida ne’e, baliza ka halo toos besik malu liu ho komunidade Fatumean no Indonézia ho distánsia ho metru 100 no dala ruma abitante hosi Timor-Leste livre tama ba área Indonézia hodi kompara sasán no hosi Indonézia nia tama mai Timor-Leste.

Daudaun ne’e parte seguransa Unidade Patrullamentu  Fronteira (UPF), Korpu Espesiál Polísia (COE) no FALINTIL-Forsa Defeza Timor-Leste (F-FDTL) asegura ona fatin afetadu COVID-19 hodi hein ekipa médiku hosi Ministériu Saúde lori ona ambulánsia multi funsaun ida hodi transporte pasiente sira ba Sentru Izolamentu Vera Krús, Dili.

Tuir observasaun Agência Tatoli iha terrenu nota katak, ho transmisaun peste letál COVID-19 iha povu nia leet obriga ekipa Vijilánsia no Epidemolojia ho Laboratóriu Ministériu Saúde tenke servisu maka’as tama-sai komunidade nia uma no toos-laran hodi rekolla amostra screening masál hodi justifika rezultadu iha laboratóriu nasionál.

Daudaun ne’e iha Covalima, autoridade  seguransa kontinua fó seguransa hodi asegura desizaun serka sanitaria iha Covalima hodi minimiza transmisaun lokál  COVID-19.

Jornalista        : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here