COVALIMA, 04 marsu 2021 (TATOLI)- Ministériu Saúde no Sala Situasaun Sentru Integradu Jestaun Krize (SS-CIGC) deside no orienta, kinta ne’e ba oin, halo re-teste etapa daruak ba abitante sira Aldeia Klauhalek, Suku Belulik Leste, Postu Administrativu Fatumean, Munisípiu Covalima.
Re-teste etapa daruak ne’e kontinua foti amostra hosi abitante sira hodi ba laboratóriu para bele hatene klaru kona-ba kalamidade transmisaun peste letál COVID-19 iha Covalima.
Medikál Sientista, António Sales, informa prosesu re-teste etapa daruak ne’e kontinua halo fila fali ba família pasiente COVID-19 no viziñu sira hodi lori amostra swab teste ba dala-rua tan iha laboratóriu nasionál.
Notísia Relevante : Abitante sira viziñu ho pasiente COVID-19 iha Fatumean submete fali ba re-teste
Amostra ne’ebé ekipa rekolla kompostu hosi abitante tinan 17 ba leten to’o idózus sira ho totál ema na’in-47.
“Re-teste ne’e halo ba komunidade sira ne’ebé iha kontaktu direita ho pasiente COVID-19, tanba tuir regra Saúde Mundiál katak to’o loron sanulu tenke foti fali amostra hodi lori ba analiza iha laboratóriu para ita bele hatene ninia transmisaun ne’e iha ka lae,” António Seles informa ba jornalista iha Fatumean, Covalima.
Tuir observasaun Agência Tatoli nian nota situasaun klima iha Fatumean, ohin, rai udan ho kalohan taka, maibé médiku sira ho seguransa hosi PNTL no F-FDTL kontinua tama-sai komunidade nia uma hodi foti amostra.
Jornalista : Eugénio Pereira
Editór : Francisco Simões
