Eis Prezidente Republika, José Manuel Ramos Horta. Imajen/Antonio Goncalves.

DILI, 04 marsu 2021 (TATOLI)–Eis Prezidente Repúblika no Laureadu Prémiu Nobel da Paz, José Manuel Ramos Horta, hateten nasaun ida atu atinje dame tenke hatene rezolve dezafiu no konflitu ne’ebé mak mosu.

Notísia Relevante: Komemora Loron Nasionál Veteranu, hametin foinsa’e sira-nia patriotizmu-nasionalizmu

“Ko’alia kona-ba dame la’ós nasaun ida laiha funu mak foin dehan dame maibé dame ne’ebé  kle’an liu mak oinsá ita bele rezolve dezafiu no konflitu sira-ne’ebé mosu iha nasaun ida, ne’e mak foin dehan dame,” José Manuel Ramos Horta hateten lia hirak ne’e bainhira sai oradór prinsipál ba semináriu komemorasaun Loron Nasionál Veteranu ho tema “Progresu no Dezafiu ba Misaun Dame iha Timor-Leste” iha Postu Administrativu Quelicai, Munisípiu Baucau ne’ebé Agência TATOLI asesu, kuarta ne’e.

Ramos Horta hatutan, dame ne’e hahú hosi uma laran, eskola no habelar ba sosiedade. Tanba ne’e, nia dehan, bainhira mosu konflitu ruma iha uma laran ka sosiedade, bele rezolve dezafiu sira-ne’e mak foin nasaun hetan dame tanba ko’alia dame ne’e signifika solidaridade.

Nia dehan, Timor-Leste kompara ho nasaun sira seluk maske kiik maibé iha dame tanba laiha funu no konflitu Armada.

“Ha’u dala barak ko’alia ho nasaun boot sira-ne’ebé sempre mosu konflitu. Ha’u hanoin de’it mak ita-nia situasaun tanba maske ita bele iha krize oioin no nasaun ne’ebé kiik maibé tanba laiha violénsia polítika, golpe militár no golpe Estadu,” nia dehan.

Tanba ne’e, nia dehan, ko’alia kona-ba dame la’ós de’it diskursu maibé signifika joven sira iha empregu, hotu-hotu servisu no hetan oportunidade estuda, tanba ida-ne’e mak bele garante dame iha nasaun ida.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here