Atuál Komandante Polísia Militár, Majór Abel da Costa Xavier “NIKI” (liman kuana), kesi hela bandeira FALINTIL nia talin atu dada sa’e iha Uamori 1999, bainhira sei foinsa’e involve aan iha luta ba libertasaun nasionál. Imajen/Espesiál.

DILI, 03 marsu 2021 (TATOLI)—Klibur Juventude Unidade, Veteranu no Autoridade Lokál Unidade-VI iha Postu Administrativu Quelicai, ohin, komemora Loron Nasionál Veteranu nian liuhosi semináriu ida ho tema “Hametin Espíritu Unidade Hodi Kontribui ba Dezenvolvimentu Nasionál”.

Prezidente Komisaun Oraganizadóra, Luis Américo, hateten objetivu komemora Loron Veteranu Nasionál ne’e atu hametin foinsa’e nia espíritu patriotizmu no nasionalizmu atu hametin unidade iha sosiedade hodi kontribui ba prosesu dezenvolvimentu nasionál.

Notísia Relevante: Governu kontinua halo konstrusaun ba jardin dos herois

“Objetivu Klibur Juventude Unidade, Veteranu no Autoridade Lokál Unidade-VI komemora loron veteranu Nasionál tanba ita hakarak relembra fila-fali loron veteranu ne’ebé mak forma iha 1981, no halibur veteranu sira, hodi konta istória natoon ba joven sira kona-ba dezafiu saida mak sira enfrenta momentu funu ba libertasaun nasionál nian. Nune’e, joven sira bele la’o tuir nafatin espíritu veteranu nian atu hametin espíritu patriotizmu no nasionalizmu no unidade iha sosiedade hodi kontribui ba prosesu dezenvolvimentu nasionál,” Luis Américo hateten ba Agênsia TATOLI liuhosi telefónika, tersa ne’e.

Nia dehan, veteranu sira presiza konta istória funu luta nian ba foinsa’e sira nune’e bele inspira foinsa’e sira bele kontinua hatutan espíritu luta nian hodi banati iha luta ba dezenvolvimentu nasaun nian.

“Tanba daudaun ne’e juventude lubuk ida ne’ebé nia espíritu patriotizmu ne’e mihis ona. Entaun, ita organiza halibur veteranu sira nune’e joven sira rona direta istória hosi veternu sira,” nia dehan.

Prezidente komisaun organizadora ne’e afirma, tema jerál ne’ebé sira sei foti ba loron Nasionál Veteranu ne’e mak “Hametin Espíritu Unidade Hodi Kontribui ba Dezenvolvimentu Nasionál”.

“Objetivu foti tema ‘Hametin espíritu unidade hodi kontribui ba dezenvolvimentu nasionál’ ne’e, tanba ita haree katak agora ko’alia kona-ba unidade ne’e hahú mihis ona. Tanba, loron veretanu ne’e signifika korpu Timor FALINTIL nian ne’ebé hahú iha 1981, maibé hafoin ukun-aan sa’e mai, ita haree unidade hahú menus hosi lidér polítiku to’o ba juventude sira,” nia dehan.

Entaun, nia dehan, ho tema ne’e oinsá atu hametin fila-fali unidade hahú hosi juventude nune’e futuru bele halo dezenvolvomentu ne’ebé mak di’ak ba rai ne’e.

Nia subliña, Oradór prinsipál ne’ebé sei partisipa iha serimónia komemorasaun loron veteranu ne’e mak hanesan Eis Prezidente Ramós Horta, no Ministru Asuntu Kombatente Libertasaun Nasionál, Julio Sarmento dos Santos.

Imajen/Espesiál.

Nia informa, oradór sira-ne’ebé sei partisipa iha semináriu ne’e sei lori temátiku ne’ebé la hanesan tanba Eis Prezidente Ramos Horta sei ko’alia kona-ba “Progresu no dezafiu ba misaun Dame Iha Timor-Leste” no Ministru MAKLN sei ko’alia kona-ba “Programa VIII konstituisionál asuntu veteranu” nian.

Nia hatutan, objetivu bolu Eis Prezidente Ramos Horta ba ko’alia kona-ba progresu no dezafiu ba misaun dame iha TL, tanba agora daudaun joven barak mak la’o iha dalan sala hodi hamosu konflitu tanba joven presiza hatene saida mak dame.

”Ita haree joven agora barak mak hamosu konflitu iha fatin-fatin, lakohi kontribui dame ba rai ida-ne’e, entaun ita aprosima ba Ramos Horta mai fó hanoin dame nian ba joven sira, nune’e bele inspira joven sira bele sakrifika aan hodi halo dezenvolvimentu nasionál no dezenvolve rai ida-ne’e,” nia dehan.

Nia argumenta, Orsamentu ne’ebé sira uza realiza atividade ne’e hetan kontribuisaun hosi aman veteranu sira hosi unidade-VI, mestre sira, komunidade, autoridade lokál sira iha Munisípiu no Gabinete Apoiu Sosiedade Sivíl.

“Totál kontribuisaun ne’ebé ami hetan hodi hala’o atividade ne’e hamutuk $1.500,” nia informa.

Entretantu, partisipante sira-ne’ebé parstispa iha serimónia ne’e mak hanesan Eis Prezidente Repúblika Ramos Horta, MAKLN Júlio Sarmento Meta Mali, Administradór Postu Administrativu Quelicai ninian, polísia, komunidade sira hosi suku sira iha Postu Administrativu Quelicai nian. 

Jornalista: Arminda Fonseca 

Editór: Cancio Ximenes

HAKEREK NO HATÁN

Please enter your comment!
Please enter your name here