Sekretáriu Estadu Formasaun Profisionál no Empregu, Alarico do Rosário Imajen TATOLI/Egas Cristovão

DILI, 09 fevereiru 2021 (TATOLI)—Sekretáriu Estadu Formasaun Profisionál Empregu (SEFOPE), Alarico do Rosário, hamutuk ho ekipa halo enkontru ho Primeiru-Ministru, Taur Matan Ruak, hodi atualiza preparasaun ba konstrusaun Sentru Formasaun Exelente.

“Ami ko’alia asuntu lubuk ida, hanesan konstrusaun Sentru  Formasaun Exelente, kona-ba ninia progresu. Sentru ne’e SEFOPE identifika ona fatin  iha área Metinaro no fatin ne’e difinitivu  ona,” Sekretáriu Estadu Alarico informa, iha Palásiu Governu Gvernu, tersa ne’e.

Governante ne’e dehan, daudaun tékniku SEFOPE  hamutuk ho ekipa interministeriál  sira  iha hela faze preparasaun, ne’ebé halo hela estudu ba rai atu konstrui.

“Liga ba rai iha mós koordenasaun ho Terra no Propriade ne’ebé tenke  haree ba ema-nia ai-horis no seluk tan, tanba  konstrusaun ba sentru ne’e rasik sei kleur tanba buat balun sei tuir regra no prosesu sira,” nia akresenta.

Notísia relevante: Sentru Formasaun Exelente Sei Reduz Dezempregu iha Rai Laran

Tuir Sekretáriu Estadu, sentru formasaun sei han tempu naruk tanba sei liuhosi konkursu públiku no prosesu seluk.

“Tanba ita atu harii Sentru Formsaun Exelente ho kualidade iha Ázia, la’ós buat naran de’it, tanba ne’e sei liu faze pur faze hanesan deseñu ne’ebé di’ak,” nia hatutan.

Orsamentu ba konstrusaun obra Sentru Formasaun Exelente ne’e antes ne’e VIII Governu prevee ona iha orsamentu 2020 hamutuk millaun $15.

Sentru Formasaun ne’e sei akumula ema to’o 5.000 no sei harii iha rai ho medida ektare 27.

Komunidade afetadu husi projetu ne’e hamutuk 74, tanba ne’e Governu sei matein fó indeminizasaun ho opsaun rua mak hanesan, fó de’it osan no opsaun seluk maka halo bairru foun, depende ba kondisaun.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here