Imajen TATOLI/Osória Marques.

DILI, 03 marsu 2021 (TATOLI)—Sekretária Jerál Organizasaun Populer Mulher Timorense (OPMT), Florentina da Conceição Pereira Martins Smith hateten, ohin, loron nasionál ba veteranu nian ne’e OPMT selebra ho espozisaun ba livru “Buibere Hamriik Tuba Rai Metin Ukun Rasik-Aan iha arkivu múzeu rezisténsia Timor-Leste.

Notísia Relevante: PR Lú Olo sei lansa livru “Buibere Hamriik Ukun Rasik-An”

Nia hatutan, loron 3 marsu hanesan loron ida-ne’ebé importante tebes marka istória Repúblika Demokrátika Timor-Leste (RDTL) luta naruk ba funu na’in sira entre mane ho feto sira-ne’ebé hakerek ona iha estatutu Kombatente Libertasaun Nasionál.

Imajen TATOLI/Osória Marques.

“Tanba ne’e, ohin ita komemora loron veteranu nian hodi kontinua fó korajén no motiva foinsa’e sira hodi haktuir saida mak sira husik hela no importante mós ba feto. Tanba, veteranu konta mós ho veteranu partisipasaun feto nia-luta ba ita-nia independénsia, ne’ebé ohin ita hotu sai sasin ba Estadu Direitu Demokrátiku ida-ne’e,” Florentina da Conceição Pereira Martins Smith hatete ba jornalista sira, bainhira vizita espozisaun, iha Arquivo Múzeu Rezisténsia Timorense (AMRT), Dili, kuarta ne’e.

Nia dehan, liuhosi abertura espozisaun ne’e atu bele hatene partisipasaun feto sira-nian iha luta naruk ne’ebé hahú hosi 1974-1999.

Tanba, nia dehan, molok atu halo lansamentu ba livru ne’e, parte CPEHLMT ho OPMT hakarak komemora loron veteranu ho espozisaun refere.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here