Livru “Buibere Hamriik Ukun Rasik An” nia kapa oin-kotuk. Imajen/Espesiál.

DILI, 03 marsu 2021 (TATOLI)—Sekretária Jerál Organizasaun Populer Mulher Timorense (OPMT), Florentina da Conceição Pereira Martins Smith, informa semana oin Prezidente Repúblika Francisco Guterres Lú Olo sei lansa livru “Buibere Hamriik Tuba Rai Metin Ukun Rasik-Aan”.

Florentina da Conceição Pereira Martins Smith hatutan, livru ne’e Comissão Pesquisa Elaboração História da Luta da Mulher Timorense (CPEHLMT) hamutuk ho OPMT mak prodús no tuir planu sei lansa iha komemorasaun Loron Mundiál ba Feto iha loron 08 marsu 2021.  

Florentina Smith .

“Ohin, primeiru dia ba publisidade ne’ebé mak Komisaun Organizadora kompostu hosi Comissão Pesquisa Elaboração história da Luta da Mulher Timorense hamutuk ho OPMT ho hanoin ida atu halo publisidade ida kona-ba ámbitu lansamentu livru “Buibere Hamriik Tuba Rai Metin Ukun Rasik-aan”, ne’ebé sei lansa hosi Xefe Estadu Timor-Leste, Francisco Guterres Lú Olo, iha loron 8 marsu tinan ne’e,” Florentina hateten nia diskursu, iha salasaun Múzeu Rezisténsia Timorense, Dili, kuarta ne’e.

Nia hatutan, nu’udar timoroan no hanesan feto hakarak husik hela istória ba jerasaun foun sira para jerasaun foun sir abele hatene kle’an liu kona-ba luta feto Timor-Leste nian iha tempu koloniál mai to’o referendu 1999.

Nia dehan bainhira harii OPMT iha momentu ne’ebá, ho objetivu ida katak atu hako’ak feto hotu ba iha naroman no hametin nafatin hodi hamutuk lori dezenvolvimentu ba povu no rai ida-ne’e, no sei konta istória pasadu partisipasaun feto nian ba luta independénsia nian ne’ebé hahú hosi 1974-1999.

“Ba livru ne’e, tuir ha’u-nia haree kompreensivu tanba livru ne’e kuaze konta hosi feto ne’ebé moris iha koloniál nia tempu. Saida mak sira halo iha momentu ne’ebá inklui sistema patriarkál ninian,” Florentina Smith hateten.

Nia hateten, iha livru ne’e mós sei sita kona-ba partipasaun feto Timor-Leste involve aan iha frente armada, frente klandestina no frente diplomata.

Livru “Buibere Hamriik Ukun Rasik An”. Imajen/Espesiál.

“Feto ne’ebé moris iha tempu koloniál mai to’o referendu, ne’e todan tebes tanba ita-nia sistema patriarkál mós todan ba ami feto sira. Kondisaun no nesesidade feto nian, ami konsidera sei iha númeru rua. Maibé, partisipasaun polítika no ativa feto nian ba dezenvolvimentu sosiál no justisa to’o ohin loron, ita haree forte tebes tanba feto sira hahú evolui sira-nia aan,” nia dehan.

Nia dehan, liuhosi livru Buibere Hamriik Ukun Rasik-Aan ne’e bele evolui no sai hanesan referénsia ida ba jerasaun foun sira liu-liu ba feto foinsa’e sira.

Nia informa, livru ne’e hahú elobora iha 2010-2021 no agora mak foin hetan lansamentu hosi Prezidente Repúblika Francisco Guterres Lú Olo, no ohin halo abertura ba lansamentu livru espozisaun iha Múzeu Rezisténsia Timorense.

Prosesu halo livru ne’e, nia dehan, ema barak lakon esperansa tanba parte hotu tenke halo peskiza ida kle’an. Involvementu prosesu halo livru ne’e mesak joven Timoroan hamutuk na’in-20 ne’ebé tuir selesaun hafoin halo servisu hanesan peskizadór no sai hakerek na’in.

“Ami la dehan livru ne’e perfeitu ona. Maibé ami iha netik istória ba partisipasaun no kontribuisaun feto nian iha funu ne’e importante tanba liuhosi livru ne’e bele enkoraja, motiva foinsa’e sira,” nia dehan.

Nia hateten, livru ne’e sei halo diseminasaun liuhosi semináriu no livru balun sei tau iha Múzeu Rezisténsia Timorense hodi bele asesu ba leitura públiku.

“Kona-ba kuríkulu feto nian mós, ami komesa halo koordenasaun ho Ministériu Edukasaun Juventude no Desportu (MEJD), atu nune’e bele fó kontinuidade ba kuríkulu istória feto Timor nian. Livru Buibere Hamriik Ukun Rasik-Aan ho kapítulu 14 no pájina hamutuk 572,” nia dehan.

Líder nasionál no lider karismatiku Kay Rala Xanana Gusmão iha ninia apresiasaun ba livru ne’e hateten; “Livru ida ne’e sai hanesan Tezouru ida ba Istória Rezistênsia Timor-Leste nian, iha funu naruk no todan tebes. Livru ida ne’e konta ba ita hotu no ba jerasoins ne’ebé sei tuir mai, partisipasaun, dedikasaun no determinasaun feto sira-nian, hahú kedas iha 1974 no 1975, to’o iha funu laran.”

Sekretáriu Jerál FRETILIN, Mari Alkatiri hateten; “Livru ne’e hato’o informasaun no análize klean kona-ba luta eróika Buibere sira-nian, katak feto Timor-Leste tanen aas prinsípius no valores ne‘ebé Fundador Independénsia sira hamosu iha ita-nia rai doben ida ne’e. Hato’o saída no oinsá ita-nia eroína sira hakat dezafiu, nakfilak situasaun, no asume responsabilidade no luta ba kore ita-nia Pátria, nu’udar mós dalan ida ba sira kore-an nu’udar feto no partisipa iha luta ba inkluzaun sosiál, polítika, kulturál no ekonómika.”

Aleinde ida-ne’e, Laureadu Prémiu Nobel da Paz, José Ramos Horta hato’o nia apresiasaun katak livru ne’e hanesan; “Obra únika ne’e fó omenajen ba ita-nia feton sira. Obra ne’e sei hela ba istória, ita-nia jerasaun ohin loron nian no aban bainrua nian.”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here