Veteranu Cornelio Gama L-7. Imajen TATOLI/Antonio Goncalves.

DILI, 03 marsu 2021 (TATOLI)—Veteranu Cornélio Gama ‘L-7’  hateten restu mortál hamutuk 450 ne’ebé nia rekolla no haloot hela iha fatin propriu ida Postu Administrativu Laga, Munisípiu Baucau ne’e, Governu tenke rekoñese hodi estabelese monumentu ba restu mortál hirak ne’e tanba mate iha batalla.

Notísia Relevante: Veteranu sira husu Governu buka-tuir PR Nicolau Lobato nia ruin

“Ema sira-ne’e la’ós funu ba família, funu ba nasaun. Restu mortál agora hamutuk 450, balun la manán osan ne’e oinsá. Tau iha-ne’ebá ka hakohi iha-ne’ebá ka lori mai iha-ne’e, Governu tenke haree. Tenke selu sira-ne’e, nune’e ami família halo sira-nia monumentu. Ema halo tiha funu depois osan laiha, ita atu halo oinsá,” Cornélio Gama ‘L-7’  informa ba Agência TATOLI, iha resintu Parlamentu Nasionál, tersa ne’e.

Nia esplika, hosi restu mortál 450 ne’e iha 50 mak hetan subsídiu maibé 400 seidauk hetan tanba naran laiha lista.

“Momentu ne’e, ha’u dehan ba sira identifika didi’ak ema sira, mai hosi ai-laran ba subar tán fali iha ai-laran, ne’e mak ha’u la konkorda. Se tau iha-ne’ebá di’akliu tau iha Metinaro duké subar de’it,” nia dehan.

“Ha’u-nia hakarak hanesan ne’e buat hotu-hotu tenke konsulta ami para atu bele haree saida maka ami fó hanoin ba Governu,” nia dehan.

Deputadu Bankada Partidu Libertasaun Populár ne’e hateten, restu mortál ne’e konserva hela iha Laga ne’e, Governu tenke haree didi’ak tanba ema sira-ne’e mate iha kampu batalla.

“Ezemplu ita na’in-tolu iha-ne’e hanoin la hanesan, ita tenke haree didi’ak, ema sira-ne’e iha funu mak mate ka mate tanba hamlaha, FALINTIL ka populasaun. Restu mortál sira-ne’e família simu ona osan ka seidauk,” nia hateten.

Nia dehan, restu mortál sira-ne’e mate iha kampu batalla maibé estadu fó subsídiu tanba ema sira-ne’e mate ba nasaun.

Notísia Relevante: Timoroan tenke halo “Minutu Ida Hakmatek” ba loron nasionál veteranu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here