Traballadór sira habai hela kafé iha área tasi-ibun Tasitolu, Kinta 8 Agostu 2019. Imajen/TATOLI.

DILI, 02 marsu 2021 (TATOLI)—Prezidente Konfederasaun Sindikatu Timor-Leste (KSTL), Almeiro Vila Nova, informa hahú hosi fulan janeiru-dezembru 2020 KSTL rejistu kazu traballadór sira-nian hamutuk 233.

Notísia Relevante: KSTL husu Governu halo revizaun ba saláriu mínimu

“Ami registu kazu kona-ba traballadór sira iha períodu 2020, hahú hosi janeiru-dezembru nia laran ne’e, KSTL rejistu kazu hamutuk 233 no hosi kazu ne’e ho iha tipu oioin,” Almeiro Vila Nova hateten ba Agênsia TATOLI iha nia knaar fatin, Bemori, Dili, tersa ne’e.

Nia hatutan, kazu traballadór sira-nian ne’ebé KSTL rejistu ne’e iha kategori hanesan hapara Serbisu tanba traballadór balun mak foti lisensa maternidade fulan 3 nian depois empregadór hasai tiha.

Nia dehan, iha kazu balun mak feto sira foti lisensa maternidade nian maibé la hetan pagamentu ba maternidade refere, Maibé, tuir nia, entre kazu sira-ne’e kazu kona-ba saláriu mak barak liu.

“Empreza balun hatun traballadór sira-nia saláriu tanba iha situasaun Estadu Emerjénsia (EE) kompañia haruka sira deskansa iha uma maibé lahó pagamentu ruma. Iha balun, servisu nafatin maibé kompañia redús tanba rendimentu menus. Ida-ne’e mak sai preokupasaun traballadór sira-nian ne’ebé mai hato’o kestaun sira-ne’e ba KSTL. Maibé, KSTL konsege rezolve problema sira tuir arigu 15 iha lei traballu katak bainhira akontese suspensaun ba kontratu, traballadór bele deskansa iha uma durasaun fulan rua, maibé metade hosi kompañia selu nafatin,” nia dehan.

Nia hateten, ida-ne’e mak hosi KSTL durante ne’e halo hodi ezije kompañia sira atu garante nafatin saláriu 50% hosi traballadór sira-nia saláriu mensál.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here