Majór Jenerál no Veteranu Falur Rate Laek. Imajen/Espesiál.

DILI, 02 marsu 2021 (TATOLI)—Majór Jenerál, Falur Rate Laek, hateten Loron Nasionál Veteranu nu’udar loron importante ba Governu presiza halo reflesaun hodi foti referénsia ba martires no éroi libertasaun nasional sira-ne’ebé fó aan ba mate, hodi bele manan Ukun Rasik Aan ida-ne’e.

Notísia Relevante: Reflesaun ba Loron Nasionál Veteranu, juventude muda mentalidade no tenke matenek

Majór Jenerál no veteranu Falur Rate Laek hatutan, iha komemorasaun Loron Nasionál Veteranu ne’e, nia tatoli lia-tatoli ba governante sira atu tau iha konsiénsia no halo reflesaun ida katak hosi martires no éroi libertasaun nasionál sira-nia mate mak ohin loron sai ukun-na’in.

“Ha’u-nia mensajen mak ema hotu ne’ebé moris iha Timor, atu ukun ka la ukun, sira mate ona ne’e referénsia ba ema hotu. Ó kuandu halo buat ruma ba ó-nia aan, família, komunidade, iha ne’ebé tenke halo fererénsia ba sira ne’’ebé mate ba rai ida-ne’e,” Falur Rate Laek hateten ba Agênsia TATOLI hodi hato’o ninia reflesaun no mensajen ba membru Governu kona-ba loron Nasionál Veteranu ne’ebé kada tinan selebra iha loron 03 marsu, iha edifísiu Fundasaun Falur Rate Laek, Faról, Dili, segunda ne’e.

Nia dehan, loron 03 marsu loron ne’ebé presiza ema hotu halo reflesaun tanba sira ne’ebé mate, sira la reklama katak moris karik atu hetan pensaun vitalísia ka sai deputadu, tanba ne’e presiza ema hotu halo referénsia hodi halo reflesaun ba sira mate tiha ona ne’e.  

“Atu ita ida-idak reflete ba ita-nia aan. Haree o atu sai boot no riku, iha rai ida-ne’e tenke halo referénsia ba sira. Laiha ona iha mundu ida-ne’e liu-liu haree ba inan no feto ne’ebé hetan viasaun seksuál, torturasaun to’o mate, matenek, beik inosente ne’ebé mate barak presiza halo referésia ba sira. Tanba, sira ida uluk mate ne’e, iha foho sira-ne’e mesak ó ho loron mota kuak rai tetuk mesak mate ruin deit,” nia dehan.

Tanba ne’e, nia husu ba Governu la presiza timoroan mak sai  elite ekonómiku no polítiku iha Timor-Leste.

 “La presiza ita sai elite ekonímiku iha ita-nia rain no la presiza Timor-Leste sai elite polítika ida hodi domina buat sira seluk. Tanba, ema-ne’ebé sai vítima liu ne’e mak povu  ki’ik, ne’ebé buat hotu tenke fahe hanesan,” nia dehan,

Nia hanoin ba governante sira, labele hadau malu riku-soin no riku soin ne’ebé iha tenke fahe hanesan, tanba sira mate la reklama buat ida ona.

 “Nusa mak ita ida moris ne’e reklama buat ne’ebé ita hetan ona mós seidauk to’o nafatin. Buat hotu tenke haree ba sira ne’e laiha ona iha mundu ida ne’e, tanba uluk ita hateten katak o mate o nia rate laiha o nia isin no ran mak sei halo rai ne’e sai buras ba jardin Timor tomak,” Falur haktuir.

Kontribudór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here