Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, tersa (02/03). Imajen TATOLI/Egas Cristóvão

DILI, 02 marsu 2021 (TATOLI)–Konsellu Ministru (KM) aprova projetu Dekretu Governu, ne’ebé aprezenta hosi Primeiru-Ministru (PM), Taur Matan Ruak, kona-ba medida ezekusaun Estadu Emerjénsia (EE) ba da-11, ne’ebé renova hosi Dekretu Prezidente Repúblika númeru 15/2021, iha loron 01 marsu hodi hatán ba pandemia COVID-19.

“Estadu Emerjénsia daudaun ne’e renova, abranje territóriu nasionál tomak no vigora hahú oras 00:00 loron 04 marsu 2021 to’o oras 23:59 iha loron 02 abríl 2021,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, tersa ne’e.

Notísia relevante: PN autoriza PR Lú Olo dekreta EE ba dala-XI

Portavós Governu ne’e esplika, ein jerál mantein medida ne’ebé antes  aprova ona, liuliu bandu ultrapasa fronteira ba fins tradisionál ka kustumeiru no asesu ba merkadu reguladu, sirkulasaun internasionál hala’o de’it liuhosi postu fronteira terrestre, ne’ebé bele taka tuir desizaun Ministériu Interiór (MI) bainhira iha razaun seguransa ka saúde públika justifika.

Aleinde ne’e, sujeisaun ba ema hotu ne’ebé hakarak tama ka sai hosi territóriu ba kontrolu sanitáriu, impede sirkulasaun internasionál ba ema hotu ne’ebé hatudu sintoma COVID-19, impozisaun ba izolamentu prolifilátiku ou kuarantena ba ema hotu bainhira tama iha territóriu nasionál no sujeisaun ba ema hotu ne’ebé infetadu COVID-19 ba izolamentu terapéutiku.

Durante vijénsia diploma ne’e, ema hotu ne’ebé hela iha Timor- Leste tenke mantein distánsia pelumenus metru ida ho ema seluk, utiliza máskara oin taka inus no ibun bainhira asesu ka tama ba fatin públiku ka privadu ba utilizasaun koletiva, fase liman bainhira hakarak tama ba estabelesimentu komersiál no industriál sira ka hainhira halo serbisu iha edifísiu serbisu administrasaun públika.

“Oras ne’e prevee posibilidade suspende temporária prosesu ensinu no aprendizajen, iha rejime prezensiál, no karik departementu governamentál responsável ba saúde públika rekomenda ho efeitu atu hamenus risku transmisaun COVID-19,” governante ne’e subliña.

Dekretu Governu ne’e prevee katak família hosi misaun diplomátika akreditada iha Dili bele mós kumpre períodu izolamentu profilátiku iha fatin indikadu hosi Ministériu Saúde ka hela iha fatin rasik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here