Primeiru-Ministru, Taur Matan Ruak hamutuk ho membru Governu no Sala Situasaun CIGC, diskute pedidu renovasaun deklarasaun EE ba dala-11 hosi Prezidente Repúblika, iha sala plenária PN, segunda (01/03). Imajen TATOLI/Egas Cristóvão

DILI, 01 marsu 2021 (TATOLI)Rezultadu restreiu ne’ebé mak Ministériu Saúde (MS) no Sala Situasaun Sentru Integradu Jestaun Krize (CIGC, sigla portugés) halo iha munisípiu Bobonaro, hatudu katak la rejista kazu pozitivu no laiha sinál transmisaun lokál no komunitária.

Tanba ne’e, Sala Situasaun CIGC rekomenda Governu termina serka sanitária iha munisípiu Bobonaro, tanba konfirmadu zero kazu COVID-19.

”Bazeia ba rezultadu restreiu iha munisípiu Bobonaro hatudu negativu, signifika laiha sinál transmisaun lokál oukomunitária, maibé risku elevadu pasajen klandestina hosi fronteira terrestre eziste nafatin, maibé bele termina serka sanitária iha munisípiu ne’e no intensifika vijilánsia sintenela ne’ebé tenke halo nafatin iha ospitál, sentru saúde, no restreiu grande kuantidade iha zona seletiva”, Xefe Estadu Maiór Koordenadór Sala Situasaun CIGC, Komodoro Donaciano do Rosário da Costa Gomes ‘Pedro Klamar Fuik’, informa durante halo aprezentasaun iha ámbitu debate estensaun Estadu Emerjénsia (EE) ba dala-11, iha sala plenária Parlamentu Nasionál (PN), segunda ne’e.

Iha 15 fevereiru, Konsellu Ministru deside halo serka sanitária iha munisípiu Covalima no Bobonaro tanba risku ba pasajen ilegál liuhosi fronteira terrestre ho nasaun viziñu Indonézia, hahú loron tuir mai hafoin desizaun ne’e sai (16/02) to’o 23:59 loron 03 marsu 2021.

Notísia relevante: Reuniaun KM: deside bandu deslokasaun munisípiu seluk bá Bobonaro-Covalima

Atuál Diretór Institutu Defeza Nasionál (IDN) ne’e afirma, medida ne’ebé presiza halo maka hahú marsu 2021, mantein alerta 3 ‘metigasaun’ iha territóriu nasionál tomak, intensifika vijilánsia sintinela no prepara kondisaun ba faze karik iha transmisaun komunitária.

“Ba munisípiu Covalima tuir avaliasaun ne’ebé maka Sala Situasaun halo, atu mantein serka sanitária, intensifika medida restritiva sira, halo konfinamentu obrigatóriu, proibi juntamentu seremónia kulturál sira nune’e mós relijioza,” Xefe Estadu Maiór Koodenadór Sala Situasaun ne’e subliña.

Enkuantu, Sala Situasaun mós husu ba públiku tomak katak ema hotu ne’ebé maka tama no sai hosi Covalima tenke kumpre kuarentena durante loron 14.

Hahú hosi Timor-Leste rejista kazu COVID-19 dahuluk iha marsu 2020 to’o agora, totál kazu konfirmadu iha Timor-Leste hamutuk 113, ne’ebé maioria importadu hosi nasaun viziñu Indonézia, númeru rekuperadu hamutuk 94, kazu ativu 23 (inklui pozitivu 2 horiseik) no seidauk rejista ema mate.

Enkuantu, to’o oras ne’e, ekipa saúde halo ona teste ba ema 21.323 no hosi totál ne’e na’in-21.013 ho rezultadu negativu, enkuantu 197 hein hela rezultadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here