Prezidente Repúblika, Francisco Guterres Lú Olo, Prezide Reuniaun Konsellu Estadu iha Palásiu Prezidente Nicolau Lobato, Bairru Pite, Dili, kuarta, (24/02). Imajen Tatoli /Egas Cristovão

DILI, 24 fevereiru 2021 (TATOLI)—Xefe Kaza Sivíl Prezidente Repúblika, Francisco Maria de Vasconcelos, hateten tuir rezultadu reuniaun ohin, Konsellu Estadu (KE) no Konsellu Superiór Defeza no Seguransa (KSDS) rekomenda ba Xefe Estadu Francisco Guterres ‘Lú Olo’ atu halo pedidu ba Parlamentu Nasionál (PN) atu estende Estadu Emerjénsia (EE).

“Konsellu Estadu (KE) no Konsellu Superiór Defeza no Seguransa (KSDS) rekomenda ba Xefe Estadu Francisco Guterres ‘Lú Olo’ atu halo pedidu ba Parlamentu Nasionál (PN) atu estende Estadu Emerjénsia (EE).  Ida-ne’e mak desizaun hosi konsellu rua nian ne’ebé rekomenda ona PR Lú Olo. Orsida ka aban dadeer, Prezidente Repúblika sei haruka pedidu Governu nian ba Parlamentu Nasionál hodi diskute no aprova, depois PR bele dekreta,” Francisco Maria de vasconcelos hateten ba jornalista sira iha Pálasiu Prezidensiál Nicolau Lobato, Bairru Píte, Dili, kuarta ne’e.

Nia hatutan, kona-ba medida sira ne’e nafatin mantein ho medida ida uluk nian maibé só aumenta maneira ida tán mak Falintil-Forsa Defeza Timor-Leste (F-FDTL) mak sei fó apoiu tan servisu hodi asegura fronteira.

Nia hatutan kona-ba partisipasaun no involvementu F-FDTL iha fronteira nian ne’e, depois mak Governu deside maibé sei hein PN.

Nia dehan bainhira PN aprova ona pedidu ne’e, mak foin Governu halo fali dekretu ida hodi medida saida mak bele aplika iha territóriu, liuliu iha Munisípiu Bobonaro no Covalima inklui Rejiaun Administrativa Espesiál Óe-Cusse Ambeno (RAEOA).

Konsellu Superior Defeza Seguransa (CSDS) ne’ebé marka prezensa iha reuniaun ne’e mak atuál Xefe Estadu Francisco Guterres “Lú Olo”, Primeiru-Ministru Taur Matan Ruak, Ministru Defeza Filomeno de Jesus Paixão, Ministra Negósiu Estranjeiru no Kooperasaun Adaljiza Albertina Xavier Reis Magno, Xafe Estadu Maiór Jenerál F-FDTL Majór Jenerál Lere Anan Timur, Komandante Jerál PNTL Faustino da Costa, Cristina Alves da Silva, David Dias Ximenes Mandati, Ministra Saúde Odete Maria Freitas Belo, Ministru Justisa Manuel Cárceres, Diretór Ezekutivu FONGTIL Daniel Santos do Carmo, Abel da Silva.

Entretantu, membru Konsellu Estadu ne’ebé partisipa iha reuniaun ne’e mak atuál Xefe estadu Francisco Guterres “Lú Olo”, Prezidente Parlamentu Nasionál Aniceto Guterres, Membru Konsellu Ministru, Eduardo Barreto, Prezidente Komisaun Nasionál Eleisaun (CNE) Alcino Barris, eis Prezidente José Ramos Horta, Aurora Ximenes, Maria Dadi Soares Magno.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here