DILI, 01 marsu 2021 (TATOLI)-–Primeiru-Ministru (PM), Taur Matan Ruak, hateten Governu prontu no esforsu repatria estudante timor-oan iha rai-li’ur.
“Ita-nia sidadaun ka estudante sira iha rai-li’ur, bainhira hakarak fila ita esforsu no aranja osan atu evakua sira, do que sira halai ida-idak mai no tama hosi fronteira terrestre ilegálmente. Ita-nia sidadaun to’o agora seidauk iha pedidu mai,” PM Taur hateten iha debate estensaun Estadu Emerjénsia (EE) ba dala-11 iha sala plenária Parlamentu Nasionál (PN), segunda ne’e.
Notísia relevante: Formandu timor-oan iha Israel seidauk bele repatria tanba aeroportu taka
Ba kestaun ne’e, Xefe Governu husu ona ba Ministériu Negósiu Estanjeiru no Kooperasaun (MNEK) no Ministériu Ensinu Superiór, Siénsia no Kultura (MESSK) hodi tau matan ba estudante no sidadaun sira ne’ebé hakarak mai no kontinua esforsu hodi solusiona problema ne’ebé sira hasoru.
PM hato’o kestaun ne’e hodi responde ba rekomendasaun Deputadu sira iha PN durante debate, ne’ebé fó sujestaun ba ministériu relevante foti medida solusiona problema timor-oan ne’ebé hala’o estudu iha Indonézia no rai seluk.
Iha sorin seluk, MNEK esforsu atu repatria formandu timor-oan iha nasaun Israel, maibé Governu Israel la fó fatin tanba aplika serka sanitária iha nasaun.
“Ita-nia maluk sira iha Israel, ita halo esforsu atu lori sira mai, maibé simplesmente Governu Israel la autoriza,” nia akresenta.
Jornalista: Florêncio Miranda Ximenes
Editora: Julia Chatarina
