Diretór Nasionál Formasaun no Treinamentu Agríkola, Ipolito da Costa. Imajen TATOLI/Natalino Costa

DILI, 08 fevereiru 2021 (TATOLI)—Ministériu Agrikultura no Peska (MAP) liuhosi Koordenasaun Ministériu Negósiu Estranjeiru no Kooperasaun (MNEK) seidauk bele halo repatriasaun ba formandu timor-oan na’in-72, ne’ebé ba tuir formasaun iha área ortikultura durante tinan-ida, iha Arava International Center for Agriculture Training (AICAT), tanba daudaun aeroportu iha Israel taka.

“Ita planeia loloos sira atu mai semana kotuk, ne’ebé ajénsia viajen koordena ona ho Ministériu Saúde no Ministériu Negósiu Estranjeiru no Kooperasaun, maibé última hora maka karta ida mai fali katak Israel la autoriza aviaun bele tama, tanba ne’e maka adia fali,” Diretór Nasionál Formasaun no Treinamentu Agríkola, Ipolito da Costa, informa ba Agência TATOLI, iha edifísiu MAP, Comoro, segunda ne’e.

Nia dehan, loloos estudante sira mai iha semana kotuk maibé la konsege tanba iha Israel rasik sei iha situasaun lockdown totál hela.

“Karta ofisiál mai MNEK ona katak ami seidauk bele autoriza aviaun tama, tanba lockdown hela. Hanesan Governu nia desizaun, karta mai ona iha MNEK no ami mos hetan ona, ita hein katak tempu oin mai sei loke fali sira-nia aeroportu,” nia akresenta.

Maski nune’e, tuir Diretór ne’e, preparasaun ne’e la’o nafatin maibé depende ba situasaun ema-nia rai, tanba daudaun billete preparadu, tanba ne’e bainhira adia bele fó impatu ba aviaun no billete.

“Ita dala-rua ona, uluk atu mai maibé lockdown no foin daudaun deside semana kotuk atu lori estudante sira mai, maibé iha loron-tolu antes ita hetan karta husi sira-nia Governu liuhosi sira-nia Embaixada iha Singapura, mai ita-nia Embaixada no MNEK katak aviaun labele tama,” nia haktuir.

Nune’e, parte MAP husu ba estudante sira atu pasiénsia hein oituan tamba situasaun atuál, la’ós hanesan situasaun normál.

“Agora situasaun la’o hanesan ne’e, ema-nia nasaun ne’e ema-nia direitu, tanba ema iha lei idak-idak ne’ebé la hanesan,” nia tenik.

Jornalista: Natalino Costa

Editora: Julia Chatarina

1 KOMENTÁRIU

  1. Bsokten, fo rajaun ida nbe la masuk akal, lockdown ne ls fn primeira ves mbe dala 2 liu ona..ami nia kolega estudante hsi nasaun seluk bele fila hela, nusa mk ami labele?
    Sira help ami hanesan llos lbrk kik ne, hlo ami kontte ls ona at fila ikus mai kançela. To ikus afeta ba ami nia vintage atur serbisu laiha tmb dt hnoin ls hkrk fila..
    Abc…

HAKEREK NO HATÁN

Please enter your comment!
Please enter your name here